July 25-ah Chinese Super League

Covid-19 vanga hun rei tak chhung an khelh ṭan theih loh hnuah Chinese Super League chu July 25 aṭangin an khel dawn, league an khelh ṭan theih tur thu hi Chinese Football Association (CFA) chuan Nilaini zan khan an puang.

CSL hi a tira ruahman dan chuan February 22 aṭanga khelh ṭan tur kha a ni. Mahse, China hi nikum tawp lam aṭang khan coronavirus vangin an buai a, khauh takin inkharkhipna kalpui a nih hnuah ziaawm lam an pan leh tawh.

CFA chuan thuchhuah siamin, "China-in theihtawp chhuaha hri leng a dona chuan ziaawm lam a pan zel a, tunah chuan hri hi la reh vek lo mah se thunun theih chinah a awm tawh a ni. Tunah chuan July 25-ah match a awm ṭan thei dawn tih kan puang," an ti.

Football inelna bakah China-ah hian basketball league pawh tun thla aṭang hian khelh theih tawh beisei a ni a, infiamna hi kalpui mah se a hmunah entu fans chu an awm thei rih dawn lo thung.