Villa-in Lucas Digne an hnaih

Steven Gerrard enkawl Aston Villa-in transfer bazar lamah an mit an len zel a, Everton defender Lucas Digne chu pound maktaduai 25-in an lalut hnai - he thuziak i chhiar meuh chuan an inlalut fel tawh hial mai thei.

Kum 28 mi Digne hi Everton boss Rafael Benitez hnuaiah a tla tlum lo a, Merseyside club chhuahsan hi a pawiti lo. Tun dinhmunah inbiakna hi thui tak kalpui a ni tawh a, Gerrard-a hnuaiah a khel ngei dawn.

December 1 aṭang khan Digne hian Everton tan bul a ṭan leh tawh lo a, coach Benitez chuan, "He hmuna awm a duh lo a ni," tiin a defender chuan chhuah a duh thu a lo sawi tawh a, Villa bakah hian Newcastle United, Chelsea leh Serie A club ṭhenkhat pawhin an duh a, Gerrard-a hnuaia khelh a duh zawk.

Hetihlai hian Barcelona playmaker Philippe Coutinho chuan season tawp thleng loan-a khel turin Villa a pan fel tawh a, Liverpool tana a khelhpui Gerrard-a hnuaiah a khel dawn.

Villa chuan, "Villa-a a contract ziak fel turin Coutinho hian Thawhlehni khan Villa a rawn thleng," an ti a, medical paltlangin, work permit pawh a tifel tawh a ni.

English club hian an duh chuan Coutinho hi season tawpah pound maktaduai 33-in a nghetin an lalut thei dawn a, season tawpa Atletico Madrid-a contract hmang zo tur Luis Suarez hming thlengin lam rik a ni leh tawh.

Suarez hi Juventus chuan dawr mah se a hnar a, nipui transfer-ah Major League Soccer pan a duh nia sawi a ni. Mahse, Gerarrd a lan erawh chuan a thutlukna a danglam thei mai thei.

Hetihlai hian Everton chuan Aston Villa winger Anwar El Ghazi lakluh an duh ve bawk a, Villa-in pound maktaduai 15 an chhiar laiin Everton hian season tawp thleng atana loan-a lak an duh nia sawi a ni.

Dutch winger El Ghazi hian kum 2019 khan Villa hi Ligue 1 club Lille aṭangin a zawm a, a hma season-ah loan-in a khel tawh bawk. Villains tan Premier League match 71 khelin goal 15 a khung a, Gerrard-a hnuaiah hmun a chang meuh lo.