Jamshedpur chhandamtu Ishan Pandita

Ishan Pandita chuan hun tawp nan minute hnih chiah a awm tawh tihah goal a khung a, Jamshedpur FC chu East Bengal lakah 1-0 in hnehna a chanpui.

Owen Coyle-a enkawl Jamshedpur-in hnehna an chan avangin table chung ber an luah nghal a, nizana Odisha leh Kerala Blasters result a zirin hmahruaitu erawh he thuziak i chhiar meuh chuan a danglam tawh mai thei.

Jamshedpur tan ṭum dang ang bawkin Ricky Lallawmawma leh Laldinliana Renthlei ten inkhel bul an ṭan a, East Bengal lamah Lalrinliana Hnamte chuan minute 90 a khel tluan bawk.

JFC coach Owen Coyle chuan, "Kan chance neih thlir chuan goal thum emaw li emaw, goal nga emaw khung thei kan ni a, mahse, save ṭha tak tak leh East Bengal tlarhnung ṭha takin min dang a ni. A pawimawh ber erawh beidawng loa beih kha a ni," tiin a sawi.

East Bengal coach lailawk Renedy Singh-a'n Indian player hlang bul a ṭantir a, bench aṭanga Ajax academy chhuak, kum 23 mi defensive midfielder Darren Sidoel a luhtir tih loh chu Indian player vek an ni.

Renedy chuan, "Indian player-te hian ṭha takin kan khel thei tih hi kan ring tlat tur a ni," a ti a, Indian player chungah rinna a nghah thu a sawi.