Neitu thar hmaah Southampton an chak

Southampton-in club neitu thar Dragan Solak hmaah Thawhlehni zan khan Brentford 4-1 in an sawp. St Mary's Stadium-a inkhelah hian Saints tan Jan Bednarek, Armando Broja leh Che Adams ten goal khat ṭheuh an khung bakah Bees keeper Alvaro Fernandez-a'n an lamah a ti lut bawk.

Ralph Hasenhuttl hote hian point thum hlu tak an hlawhchhuah avangin Premier League table-ah 11-naah an invawrh chho. Zanin dar 1:30 hian Brighton & Hove-in Crystal Palace an mikhual dawn a, an inbuk tawk viau tura ngaih a ni.

Goal 5 a lut
Southampton-in bul an ṭan ṭha a, minute ngana lekah defender Jan Bednarek-a'n corner aṭanga ball kal chu a tauh lut. Brentford lamin an chance ṭha neih hmasak ber chu goal-ah a chantir ve leh nghal a, minute 23-naah Vitaly Janelt chuan Bryan Mbeumo cross chu vawi khatah a volley goal nghal.

Saints-in corner kick an hmang ṭangkai nawn a, minute 37-naah box pawn aṭangin Ibrahima Diallo-a'n ṭha zetin a volley a, goal ban a per hnuah ball dan tuma dive keeper Alvaro Fernandez kut fuhin a goal.

Mualneitu an phur zui a, Saints-in Broja hmangin minute 49-naah goal thumna an khung. Hasenhuttl hote hian anmahni lam box bula ball an inpek kual hnuah Oriel Romeu-a'n through ball pe thutin halfway line aṭanga ball umtu Broja-a'n cool takin a khung.

Southampton an vannei tel a, counter attack aṭang bawkin goal lina an khung. Brentford-in attack tuma an nawr laiin ball an hloh a, halfway line aṭangin Diallo-a'n ball vawrhlut thutin Che Adams-a'n minute 70-naah Saints goal lina a khung.

Bees-in hun tawp lamah na takin nawr mah se Saints keeper Fraser Forster a che ṭha a, goal dang a luh belh tawh lo.

Lawm leh lawm lo
Southampton boss Ralph Hasenhuttl chuan, "Club neitu tharin inkhel hmuhnawm tak a thlir a, goal ṭhahnem tak a hmu. Thahrui kan ngah a, kan khelh dan kha thlir a nuam khawp ang. Training-na hun ṭha kan ngah lo chungin ruahmanna thar angin ṭha takin kan khel thei a, a lawmawm takzet a ni," tiin a sawi.

Brentford coach Thomas Frank chuan, "Inkhelh apiangin kan chak loh chuan thil thar kan zir a, tuna kan khelh dan aṭang phei chuan thil ṭhahnem tak kan zir. Kan khelh ṭhat loh avangin en let pawh a huphurhawm a, inkhelh apiangin 100% a ngai tih hrilh nawnin ka awm," tiin an khelh danah a lawm lo.

Neitu thar chu
Serbian sumdawng hausa tawntaw Dragan Solak-a thlawp company Sport Republic chuan kar liam ta khan Saints neitu ni turin Chinese sumdawng hausa Gao Jisheng-a chanpual (share) neih zawng zawng 80% chu pound maktaduai 100-in a lei.

Solak hi broadband, cable leh TV firm United Group neitu a ni a, a company hian kum khatah pound tluklehdingawn 1.67 vel a lalut niin an sawi a, a mimal hausakna hi pound tluklehdingawn khat vel nia sawi a ni bawk.

Serbian mi, an rama seilian zinga billionaire hmasa bera sawi hian firm 100 chuangah share a nei nia sawi a ni a, a chenna in hlut zawng pawh pound maktaduai 10 vel bawr a ni a, private jet ringawt pawh pathum a nei!

Saints hi tun season Premier League-ah match 20 khelin point 24 an hmu a, 11-naah an awm mek. Club neitu thar Dragan Solak hian January transfer-ah sum a thehchhuak dawn em, tih chu hunin a hril ang.