Spanish Super Cup semifinal ; Zaninah Atletico Madrid Vs Athletic Bilbao

Zanin dar 12:30 hian King Fahd International Stadium, Saudi Arabia-ah Atletico Madrid leh Athletic Bilbao ten Supercopa de Espana semifinal an khel ang. Inelna hi Spanish Super Cup tia hriat lar a ni a, nizan khan Real Madrid leh Barcelona ten semifinal hmasa zawk an khel tawh a ni.

Super Cup-ah hian Barcelona (13) leh Real Madrid (11) te record a ṭha fal. Spanish club lian pahnih hnaih teuh ber chu Athletic Bilbao (3) leh Atletico Madrid (2) te hi an ni a, an inkhel tur hi El Clasico nena khaikhin chi chu ni lo mah se inkhel hmuhnawm tak an chhawp chhuak thei ang.

2019-20 season aṭangin Super Cup-ah hian team li an khel ṭan a, Real Madrid chu champion hmasa ber niin season liam ta khan Bilbao hian Barca hnehin nomawi an chawi a, kum zawna nomawi chawi theihna hun ṭha an nei.

Chutihrualin Diego Simeone kaihhruai Atletico hi La Liga champion lai a ni a, amaherawhchu league lama an chet ṭhat loh avangin tun season-a nomawi chawi tur chuan knockout inelna an ngaih pawimawh a ṭul.

Spanish Super Cup final hi Pathianniah khelh nghal tur a ni a, nomawi chawi turin vawi hnih chauh chak a ngai a, chutihrualin team ṭha vek an tel avangin nomawi chawi a awlsam lo ang.