Harsa loin Saina a tlang

Badminton inelna Indian Open khelh laiah nimin khan Saina Nehwal a inlan a, world number 1 hlui Saina hi a khingpui Tereza Svabikova chu hliam vangin a khel zo thei lo a, game hnihna khelh hah ngai loin second round a lut.

Game khatnaah Saina hi 22-20 in a chungnung, game hnihnaah pawh 1-0 in hma a hruai leh nghal. Czech badminton player hian khelh chhunzawm duh mah se loh theih lohna avangin a inhnuhdawh a ngai.

London Olympic bronze medalist Saina chuan, "Hun rei tak chhung tournament ka khel lo, training chu ṭha takin nei mah ila inelna tak nen chuan a boruak a danglam ṭhin hle. Point ṭhenkhat hlawh chhuak tur kha chuan a harsa thei hle," a ti.

Saina hi vawiinah a inlan chhunzawm leh nghal dawn, second round-ah hian Malvika Bansod leh Samiya Imad Farooqui inkhela chak zawk a hmachhawn leh ang.

India ram chhunga badminton inelna ngaihhlutah hian PV Sindhu pawhin second round a lo in vaw kai tawh bawk. Sindhu leh Saina te hi hmeichhe singles huangah chuan India tana medal beiseina an ni.