Newcastle-in striker thar la dawn

Newcastle United chuan Burnley striker Chris Wood an lalut hnai. Magpies manager Eddie Howe chuan kar riat chhung, inhliam vanga Callum Wilson an chhawr theih loh avangin striker thar hi a zawng.

Burnley hian Wood hi Premier League-a an elpui club lakah hian hralh phal lo mah se New Zealand international striker hian buy out clause a nei a, Clarets tan dan theih a ni lo. Wood-a release clause hi pound maktaduai 25 vel nia hriat a ni.

Kum 30 mi Wood hian Championship-ah Leicester City leh Leeds United tan hming a chher tawh a, kum 2017 khan Burnley history-a player man to ber ni turin pound maktaduai 15-in Leeds aṭangin a zawm.

Premier League-ah pawh Wood hian hming a chher a, season li a khelh tawhah goal 10 a khung tling vek a, tun season-ah goal thum a khung tawh.

Burnley hian league match 17 aṭangin point 11 an hmu a, Newcastle nen an point hmuh zat inang chiahin tla thei zingah an awm. Clarets hian Magpies aiin match hnihin khel tlem mah se hun pawimawh chhoa tawnhriat nei striker an elpui laka an chan chuan manager Sean Dyche hmabak a harsa sawt ang.

Newcastle erawh neitu thar an neih avangin sum hman turah an buai lo a, January transfer-ah England international Kieran Trippier an lalut fel tawh. Eddie Howe hote hian January 15, Inrinni zanah Watford an hmachhawn leh dawn a ni.