Euro C'ship khel tur Scotland

Scotland-in kum 23 chhung inelna lian thama an inlan loh hnuah European Championship an khel dawn. Steve Clarke hote hian Red Star Stadium-ah Serbia nen hun pangngaiah 1-1 in an inhnehtawk a, penalty shootout-ah 5-4 in an hneh.

Mikhual Scotland-in minute 52-naah Ryan Christie hmangin hma an hruai a, minute 90-naah Luka Jovic hmangin an sut. Extra time-ah goal a lut lo a, penalty shootout hmangin chak zawk zawn a ngai. 

Serbia tan a vawi nganaa pet turin striker chhuanvawr Alek-sandar Mitrovic a rawn pen chhuak a, Derby County keeper David Marshall-a'n dansakin Scotland-in hnehna an chang.

Scotland hian penalty an pet hmasa a; Leigh Griffiths, Callum McGregor, Scott McTominay, Oliver McBurnie leh Kenny McLean ten an pet goal. Tartan Army (Scotland fans sawina) ten inelna sangah an ram inkhel en tur an nei leh dawn a; Premier League pawha hming langsar ni pha Liverpool left back Andrew Robertson, Arsenal defender Kieran Tierney leh Manchester United midfielder McTominay te an kawl avangin an phur khawp ang.

Scotland head coach Steve Clarke chuan, "Player-te ka chhuang hle. Hun tawp dawnah kan lamah goal an khung a, khualmualah kan khel bawk. Chutichung chuan hnehna kan sual chhuak a, Scotland tan zan duhawm a ni," tiin a sawi.

1998 FIFA World Cup kha Scotland-in inelna lian tham a khelh hnuhnun ber a ni a, first round-ah an tla. Euro bikah chuan 1996 kha an khelh hnuhnun ber a ni thung. Scotland hian inelna lian thamah first round an la paltlang ngai lo a, nakkumah neih tur hian history thlak danglam ngei an tum ang.