Chelsea leh Leicester City an chesual
Nilaini zan khan Chelsea leh Leicester City ten khualmualah West Ham United leh Everton te an hneh lo a, Premier League aṭanga Champions League khel tur a chiang lo ta hle. Blues leh Foxes hi match khat lekah an hnuaia awm Manchester United leh Wolverhampton Wanderers ten an lehpel thei tawh a, league match ruk khelh tur a la awm avangin London club pahnih Arsenal leh Tottenham Hotspur te pawh sawibo theih an ni lo.
London Stadium-ah Andriy Yarmolenko-a'n minute 89-naah Hammers chakna goal a khung a, Chelsea lakah 3-2 in hnehna an chang. West Ham tan Tomas Soucek leh Michail Antonio ten goal an khung bawk a, Blues goal hnih hi Willian-a khung a ni. Goodison Park-ah Richardlison leh Gylfi Sigurdsson te goal hmangin Everton-in goal an khung hmasa a, Leicester City-in Kelechi Ilheanacho hmangin sut ṭhen mah se goal dang hmuh tur a awm tak loh avangin 2-1 in inkhel a tawp.
Tlarhnung pawp
Chelsea-in Frank Lampard hnuaiah team thar an din chho a, Christian Pulisic a chet ṭhat chhoh bawk avangin beisei pawh an nei sang viau. Amaherawhchu Blues hi an la famkim lo a, season thara champion an thlir hmain season thara Champions League khel tur pawhin tlarhnung siam ṭhat phawt an mamawh.
West Ham lakah Blues tlarhnung a pawp a, first half-ah corner aṭangin vawi hnih goal an chhuah a, vanneiha siamin a hmasa zawk VAR hmangin pawm a ni lo. Kum 25 mi Soucek-a'n Hammers goal hmahruai khungah a inngai a, VAR hmanga en let a nih hnuin Michail Antonio chu offside position-a a awm avangin pawm a ni lo a, inhnial zui theihna tur tak a ni.
FA Cup-a Chelsea semifinal hruai thlengtu Christian Pulisic-a penalty hlawhchhuah chu Willian-a'n goal-ah a chantir a, mikhual team-in hma an hruai ta zawk. Amaherawhchu inkhelh ṭantirha Chelsea tlarhnung pawp chu first half tawp lamah pawh siam ṭhat a ni lo a, Soucek-a'n corner aṭanga ball kal tauh lutin half time-ah 1-1 in an inhnehtawk.
Beiseina êng
Chelsea-in Champions League khelh an châkna aiin West Ham-in Premier League khelh zel an duhna a sang zawk a, second half-ah Hammers an ṭang rei zawk. Hammers player thawkrim Antonio-a'n penalty a beisei pek a nih loh hnuin a tho vat a, Jarrod Bowen-a cross chu a tlawh lut - minute 51-naah 2-1 a ni.
Blues tan Willian bawk a rawn inlar a, Brazilian midfielder hian minute 72-naah mawi zetin freekick a khung. London club pahnih 2-2 in an inhnehtawk a, point an insem turah a ngaih theih hman. Mahse minute 89-naah midfield aṭanga Michail Antonio pass fing tak chu AndriyYarmolenko-a'n lain Antonio Rudiger-a'n veng mah se a ke vei lamin Kepa Arrizabalaga tana dan theih loh turin kawh zetin goal kilah a pet lut.
West Ham-in hnehna an chan avangin relegation zone aṭangin point thumin an fal ta chiah a, David Moyes-a hote hian Premier League khel zel turin beisei an nei sang leh ta hle. Thlirna dangah chuan Moyes hian Sir Alex Ferguson thlakin Manchester United-ah beisei pha lo mah se Chelsea a hneh miau avangin tun ṭumah erawh United ṭantute lawmna a siamsak a tih theih.
Foxes an chefuh thei lo
Covid-19 vanga buaina awm hnuah Leicester City-in chak hmel an hmu tawh lo a, Brendan Rodgers hote hi season tir lamah champion sawi ri thei zingah tel mah se tunah erawh Champions League khel pha lo thei dinhmunah an ding.
Goodison Park-ah Foxes an chefuh thei lo a, Everton-in bul an ṭan ṭha zawk. Minute 10-na lekah Richardlison-a'n goal hmahruai a khung a, minute 16-naah Gylfi Sigurdsson-a'n mualneitu tan goal hnihna a khung leh bawk. Second half-ah Leicester rawn insiamṭha mah se goal hmaah an hriam tawk lo a, minute 51-naah Kelechi Ilheanacho-a'n goal khat a su lut tih loh chu goal dang an khung thei lo.
Leicester City hian March 10 khan Aston Villa 4-0 in an hneh a, June 20-ah erawh Watford nen an inhnehtawk a, Brighton & Hove Albion lakah pawh point khat tho an hlawh chhuak. FA Cup-ah Chelsea hneh loin an tla a, tuna Everton an hneh leh loh takah chuan point kua hmuh theih aṭangin point hnih chauh an hmu tihna a ni a, Champions League khel turin insiamṭhat ran an mamawh hle.
UCL khelh inchuhte
Leicester City
July 4 Crystal Palace (A)
July 7 Arsenal (A)
July 12 AFC Bournemouth (A)
July 15 Sheffield United (H)
July 18 Tottenham Hotspur (A)
July 26 Manchester United (H)
Chelsea
July 4 Watford (H)
July 7 Crystal Palace (A)
July 11 Sheffield United (A)
July 15 Norwich City (H)
July 18 Liverpool (H)
July 26 Wolverhampton Wanderers (H)
Manchester United
July 4 AFC Bournemouth (H)
July 9 Aston Villa (A)
July 13 Southampton (H)
July 15 Crystal Palace (A)
July 18 West Ham United (H)
July 26 Leicester City (A)
Wolverhampton Wanderers
July 4 Arsenal (A)
July 8 Sheffield United (A)
July 12 Everton (H)
July 15 Burnley (A)
July 18 Crystal Palace (H)
July 26 Chelsea (A)
Arsenal
July 4 Wolverhampton Wanderers (A)
July 7 Leicester City (H)
July 12 Tottenham Hotspur (A)
July 15 Liverpool (H)
July 18 Aston Villa (A)
July 26 Watford (H)
Tottenham Hotuspur
Nizan Sheffield United (A)
July 6 Everton (H)
July 9 AFC Bournemouth (A)
July 12 Arsenal (H)
July 15 Newcastle United (A)
July 18 Leicester City (H)
July 26 Crystal Palace (A)