LBS Suzuki CYMA Basketball Tournament ; Khatla South an champion
Central YMA Branch zinga basketball thiam ber chu Khatla South an ni a, anni hian an veng ṭhenawm Khatla chu final hmuhnawm takah 84-77 in an hneh.
LBS Suzuki CYMA Basketball Tournament hi Inrinni zan khan R. Dengṭhuama Multipurpose Hall, Mualpuiah a ṭiak a, final thlir tur hian mipui ṭhahnem tak an pungkhawm. Entu mipui thawm a ṭha a, final boruak a sang a, chutihrualin inkhelh banah erawh Khatla-in thiam takin Khatla South an lawmpui thung.
Final chu
Khatla-in final hma match nga an khelhah point 80 an khung tling vek a, nomawi zawn zan pawhin Vanlalnunsanga (Lan-a), Eddie Zothanmawia leh Chuaudingliana te hoin inkhel bul an ṭan ṭha hle.
Amaherawhchu, Khatla South-in Michael Lalṭhakima, Gospel Lalthawmmawia leh Lalrinzuala Hnamte te an kawl a, dinhmun harsaa an awm loh nan Khatla nena an inkar hi tizim ve char charin first quarter chu 26-24 in a tawp.
Second quarter-ah squad nei hrawl zawk Khatla South an che ṭha a, 21-11 zeta an chungnungna chuan dinhmun ṭha zawkah a dintir a, third quarter zawhah phei chuan 67-57 in hma an hruai tawh zawk.
A tawp a hmuhnawm
Fourth quarter-ah Khatla-in harhtharna an chang a, minute thum chhoah chuan an inthlauhna chu 74-76 chauh a ni tawh. Amaherawhchu, Lalnundika (Tom-a) chuan minute 3:36-ah 3 points a rawn lut a, talbuai theia ding Khatla South tan thawkna hun a rawn siam sak.
Khatla lam tan final an thlen theihna tura pawimawh Eddie leh Lan-a te an squad chhah tawk loh vanga an luh tam avangin ṭang turin tha pui an chhuah thei tawh lo. Mamawh Eddie-a'n freethrow pahnih aṭangin vawi khat a lut a, point hnih dang neih belhin 77-79 ni mah se Khalta South tana Rinzuala'n point hnih a neih belh hnuah Khatla an talbuai.
Eddie leh Lan-a ten ṭum danga basket an neihnaah an hlah a, captain Lan-a chu freethrow vawi hnih a luh loh hnuah foul out. Khatla South-in hun khawhral turin ball an sem kual ṭha a, Gos-a, Zonuntluanga (Puia) leh Rinzuala ten freethrow aṭangin vawi khat ṭheuh khung belhin 77-84 in an chak.
MVP-ah Puia
CYMA Basketball-ah hian team 66 an tel a, Mizorama player ṭha an tel kim thawkhat a. Heng zinga player ṭha ber Most Valuable Player atana thlan chu Khatla South player K. Zonuntluanga (Puia) a ni.
Puia hi Khatla South Barons tana khel a ni a, tun inelnaah hian semifinal-a Bungkawn an hneh tih loah chuan match tinah point ngah ber a ni thei zel a, final bikah hian Khatla TBL star Gos-a nen point 16 ve ve an nei a. Inelna pumpui puiah hian point 130 a nei a, match tinah chawhrualin point 21.67 a neih phak avangin MVP chawimawina hi a phu hle.
Khalta South player zingah Gos-a (Khatla TBL), Ruatfela (Mission Vengthlang Hollow BBSP), Rinzuala (Tuikual South) leh Tom-a (Vanguard) tih loh chu Barons a khel vek an ni a, an veng club hi ADBBA hnuaia second division club a ni.
Best Defensive Player-ah Khatla tana inelna hmang ṭha tak Lan-a thlan a ni a, semifinal-a Khatla South laka chak lo Ramthar Veng hnenah fairplay award pek an ni.
Lawmman
Champion Khatla South Rs 40,000
Pahnihna Khatla Rs 20,000
Semifinalist Chawnpui Rs 7,000
Bungkawn Rs 7,000
Most Valuable Player K. Zonuntluanga, Khatla South
Rs 3000, trophy & certificate
Best Defensive Player Vanlalnunsanga, Khatla
Rs 3000, trophy & certificate
Fair Play Award Ramthar Veng
Trophy & certificate
Note : Inelnaa tel zawng zawng hnenah hian , bawngtuthlawh leh suahdur pek vek an ni.
CYMA Basketball 2018
Thlirletna Tawi
Team Tel Zat : 66
Total Points : 7905
3 Points : 2127 (709 basket)
Game insawpna ber
Republic Veng Vs Hlimen 85-20 (65 Pts gap)
Game khata Team foul tlem ber
Luangmual 5 Fouls (Dinthar 32-69 Luangmual)
Game khata point score tam-te
J No. Players Team Pts
7 Eddie Khatla 39
2 R-a Bungkawn 38
7 Abeua Remruata Khatla South 36 (3x5)
13 Chawnga Laipuitlang 33
13 Peka Chhinga Veng 32
17 Rina Renthlei Tuikhuahtlang 31 (3x7)
11 Rinchhana Zotlang 31
31 Muanpuia Bawngkawn 31
13 Remtluanga Hunthar 30
8 Hmachhuana Ramthar 30
Champion phu khawpin kan thawkrim - Manager, Khatla South
Khatla South hian Dawrpui Vengthar buatsaih veng leh veng basektball hmanga inelnaah second round-ah an tla nghal a, Chawnpui buatsaih inelnaah erawh semifinal thlengin Ramthar Veng lakah an vanduai.
Khatla South manager Samuel Lalṭhazuala chuan, "A hmasa berah chuan Pathian vang a ni. A dawtah chuan vengchhung support-na, player leh coach-te inpekna rah a ni a. Champion phu khawpin kan thawkrim tel bawk. CYMA Basketball a awm dawn tih kan hriat aṭangin camp kan nei a, vawi 87 zet practice kan nei a ni," tiin Vanglaini a hrilh a, coach Dennis Vanlalmawia leh a naute a fak.
CYMA Basketball 2018 champion team hi basketball huangah hmel thar a ni tawh lo a, kum 2015 khan Rum Pum Inter Veng Basketball Tournament-ah nomawi an chawi tawh a. Tuna veng inelna ngaihhlut ber CYMA Basketball-a an champion leh tak avangin tualchhung basketball chanchinah a lai lum lai an luah pha ang.