Khawngaihna lantir tum lo Klopp

Liverpool-in nipui transfer-ah player langsar Naby Keita, Fabinho, Alisson leh Xherdan Shaqiri hmangin an squad an thuam chhah a, player zawng zawng tan hmun pawimawh chan reng a harsa dawn tih a chiang.

Mahse, Reds manager Jurgen Klopp chuan player-te chuan a thutlukna an zah sak ṭhin a beisei thu sawiin, "Ka thutluknaah an lungawi lo a nih chuan buaina kan nei a ni mai," a ti!

Klopp chuan, "Midang hlimna ringawt ngaihtuah thei ka ni lo. August 31-ah player chhuah theih hun a tawp ang a, January thleng chu transfer a inhawng tawh lo ang. Chumi thla li hun chhunga hlim lo an awm a nih chuan an hlim lo a ni.

"Squad-a awm loh avang mai maia lunghnur tur a ni lo a, chu aia hrehawm zawk chu khawvelah hian a tam em em a ni. Squad-a awm player tan engkim thlak danglam turin chance a awm reng," a ti a, player-te chu squad-ah an tel phak lo a nih pawhin hmun an chan theihna tura theihtawp chhuah zawk turin a fuih.

Tun season Premier League-ah Liverpool hi Manchester City nena nomawi inchuh ber tura ngaih an ni a, hetihlai hian City player pawimawh Kevin De Bruyne chu thla thum chhung atan a inhliam.

Klopp chuan an elpui player pawimawh a inhliam avanga pawi a tih thu a sawi. German coach chuan, "KDB hi Borussia Dortmund-ah khan lakluh tumin ka lo dawr tawh. Player ṭha tak a ni a, dam vat turin ka duhsakna ka hlan a ni," a ti a, hetihrual hian player pakhat vanga City ṭhatna a danglam loh thu a sawi.

Liverpool hian zanin dar 12:30-ah Premier League match khel turin Crystal Palace chu khualmualah an lenchilh ang.