Arsenal aia hriam zawk Chelsea

Hun tawp dawna Marcos Alonso goal khung hmangin Chelsea chuan an mikhual Arsenal lakah 3-2 in hnehna an chang a, Maurizio Sarri nauten Premier League match hninah point ruk an hmu nghal a, Unai Emery hote erawhin point an la hmu lo.

Inrinni zan Stamford Bridge-a inkhelah Blues lamin a tir lam minute 20 chhungin Pedro leh Alvaro Morata te hmangin hma an hruai, chak lo tura ngaih an nih hnuah Gunners chu chawlhlawk hmain an tho leh - Henrikh Mkhitaryan leh Alex Iwobi te hmangin an sut a, chawlhlawk laiin 2-2 chiah a ni.

Gunners striker manto Pierre-Emerick Aubameyang leh Iwobi ten goal kung belh theihna tura ngaih an hlah a, second half erawh Chelsea lamin an thunun hneh hle; substitute Eden Hazard ke aṭanga ball ṭha tak chhuak chu defender Alonso-a'n chakna goal khung nan a hmang.

Minute 75

A zawnin hnehna chang mah se Chelsea manager Maurizio Sarri chuan Manchester City hnen aṭanga Premier League chhuhsak mai chu thil awlsam a la nih loh tur thu a sawi a, duhthusamin a naute an la inpeih tawh lo tih a pha lo.

Italian manager Sarri chuan, "Minute 75 chhung kha chu kan khel ṭhain nuam kan titlang hle, mahse a dang minute 15 kha chu a hrehawm hle thung. Khaikhawm nan chuan player tin an khel ṭha a, a fuh lo deuh lai la awm mah se hna ṭha takin an thawk a ni.

"Tun dinhmunah chuan kan la inpeih vek lo, hmasawna neih kan la ngai a, thla hnih hnuah kan inpeih ka beisei bawk. Vawiina hun hmasa lam minute 25 kan khelh ang hian nakinah chuan minute 90 chhung kan khelh theih ka beisei," tiin a sawi.

Blues an ṭha

Chelsea hian an thiampuipa Hazard chu inkhel turin inpeih tawh mah se bench-ah an la khek, tlarhma laiah Morata awmin a sirah Pedro leh Willian ten an thlawp thung - midfield laiah N'Golo Kante leh Jorginho te awmin, second half-ah Mateo Kovacic hmel hmuh tur a awm bawk.

Season hmasa ang bawkin wing back Alonso chu tlarhma puitu pawimawh a ni, Spnaish player hian chak taka ball a tlan luhpui hnuah Barcelona forward hlui Pedro tana khung nuam tak turin a siamsak; Spain international Cesar Azpilicueta pawhin tlarhnung aṭangin duh tawka ball a pet theih vangin Morata tan ball duhthusam a thlawh luh sak bawk.

Midfield leh tlarhma lama an chet dan en chuan Sarri naute an ṭha tawk a, tlarhnung lam erawh insiamṭhatna tur an la ngah. David Luiz leh Antonio Rudiger te inkarah ball a put fo a, a sira awm Alonso-a'n tlarhma pui ṭha viau mah se a awmna lamah ball a tlang ngun; keeper manto Kepa Arrizabalaga pawhin dan theih tura ngaih Iwobi pet a dang hman lo - goal tam zawk an chhuah lo chu an vannei!

Point 0

Arsene Wenger-a'n season 22 a chamchilh tawh Arsenal a chhuahsan a, amah thlaktu Unai Emery tan hna a awlsam nghal lo - Spanish manager hian a match hmasa berah champion lai Manchester City 2-0 in a ngam lo a, Chelsea khelmualah khel ṭha viau mah se point an hlawhchhuak thei lo. August 25 zanah West Ham nen London Derby an khel zui leh ang.

1992 hnua a vawi khat nan Arsenal-in an league match hmasa pahnihah point an hmu lo a, manager Emery erawh a zam lo. Gunners manager chuan, "Chiai loin ngawrh taka kan thawhrim chhunzawm a ngai a ni. Hmasawn kan ngai tih chu ka hria, Player ten hmabak an la ngah a, chutihrualin kan inkhelah khan lawmna tur a awm, hun ṭha kan insiam hnem," a ti.

Sevilla manager hlui chuan sawi zawmin, "Tlarhma leh a hnunglam inthlunzawmna ṭha zawk kan neih a ngai, Chelsea lakah hmun ruak kan siam hnem hle. Second half-ah khan inkhel thunun kan tum laiin kan che fuh lo zawk a, player ṭhenkhat kha an awmna tur hmunah an awm loh zeuh zeuh, insawrbing kan ngai hle," tiin a sawi.

Fuh lo lai

Kum dang ang bawkin Arsenal tlarhnung a la phui thei lo, Shkodran Mustafi-a'n Spanish striker Morata chu mal leh malah a chhuah a, amah thlawptu tur Sokratis Papastathopoulos chu mamawh laiin a awmna tur hmunah a awm lo bawk.

Spain international Nacho Monreal a dam tawh a, ani hian tlarhma a puih ṭhat bakah goal venhim kawngah pawh a rintlak hle - player puitling a ni tawh. Mahse, mual sir lehlama awm Hector Bellerin chu minute 90 chhung a hnung leh hma kar tawn tir a ni a, tlan tam viau mah se a ven tur chanpual a hlen lo hnem hle.

Mesut Ozil leh Granit Xhaka ten beisei an phak loh niah rawlthar duhawm Matteo Guendouzi a hmuhnawm in a ṭangkai leh hle. Kum 19 mi Guendouzi-a'n Man City lakah tihsual zauh nei mah se Blues hmaah erawh Gunners player ṭangkai ber anga sawi ngam a ni.

Position hrang hrangah Arsenal an la inremkhawm fuh tawk lo a ni mai thei. Amaherawhchu, manager Emery sawi angin goal khung theihna hun ṭha an insiam hnem thei, Aubameyang, Mkhitaryan leh Iwobi ten hnai tak aṭanga an hlah kha lut ni se chuan result a danglam ang - point la hmu lo mah se Arsenal hi an chhe ta vek tihna a la ni bik lo e.