Ronaldo telna Juve vannei

Cristiano Ronaldo-a'n Inrinni zan khan Juventus tan Serie A match hmasa ber a khel ta a, Portugal captain hian goal khung lo mah se a team hi Chievo lakah 3-2 in an chak - champion lai Juve hian point thum hmu turin vanneihna an mamawh tel.

Italian champion Juventus-in minute thumna lekah Sami Khedira hmangin hma an hruai a, goal engzat nge an khung belha ang? tih chu fans lam zawhna leh beiseina a ni. Mahse, beisei ang ngawtin thil a kal lo; mualneitu lamin Mariusz Stepinski (38') hmanga an si phurh an sut hnuah Emanuele Giaccherini (56') chuan an hmahruaina a khung leh bawk.

Real Madrid forward hlui Ronaldo ang bawkin a club hlui zawmtu Leonardo Bonucci chu chhawr leh nghal a ni a, Bonucci hian Stepinski tauh luh tur dang thei lo mah se, 2-1 a an hnufual laiin Mattia Bani-a'n an lama a tih luh chhana hna thawktu pawimawh a ni; hun pek belhah Federico Bernardeschi chuan Turin club tan chakna goal a khung hram.

Ronaldo awmna tur?

Inkhel ṭan hmain Massimiliano Allegri chuan Ronaldo hi khawi hmunah ber nge an dah dawn tih a la chian loh thu a sawi a, Chievo lakah chuan tlar hma laiah awmtir a ni a. AC Milan pantu Gonzalo Higuain hmunruak luahin Paulo Dybala chu a hnung chiahah dah a ni - a sir tawnah Douglas Costa leh Juan Cuadrado te an awm thung.

Kum 33 mi Ronaldo-a'n yard 20-a hla aṭangin a khung teuh hle a, angle zing tak aṭanga a volley chu goal zawnah a kal lo a, kum 39 mi keeper Stefano Sorrentino chuan vawi hnih dang ṭha zetin a dan sak bawk.

Second half-ah Mario Mandzukic dah luh niin Ronaldo chu mual sir vei lamah tawlh tir a ni. Croatian striker goal khung theih nan Ronaldo-a'n tha a thawh hlawk a, mah se VAR hman a nih hnuah an goal hi pawm a ni lo - Ballon d'Or chawimawina vawi nga dawng tawhtu hi tlarhma lamah chuan khawi laiah pawh chhawr kual theih a nih avangin Juve hian an khingpui a zirin a khelhna an siksawi sak fo a rinawm.