Season thar; Messi leh hna ngai!

Season thar ṭan nan khaw­vel hmun hrang hrangah league khelh ṭan a ni a, Lionel Messi pawhin a hna ngai bawk a thawk leh ta.

Inrinni zan khan Barcelona chuan La Liga-a an match hmasa berah 3-0 in an mikhual Alaves an sawp a, Messi chuan goal hnih a khung - goal khat dang hi Philippe Coutinho khung a ni.

Nou Camp-a inkhelah Barce­lona an chungnung tluan chhuak zak a, 79% ngawt ball changin goal-ah vawi 25 shot an nei - Alaves-in minute 90 chhunga shot an neih zawng zawng belhkhawm hi vawi thum a ni thung!

Messi bawk chu

Team pahnihin goal khung loin chawlhlawk an hmang a, minute 45 hnu lamah erawh Messi leh Barcelona tak tak an inlar thung. Minute 64-naah Messi-a'n hmahruaina goal a khung a, freekick aṭanga a pet luh a ni.

Messi goal khung hi La Liga-a Barcelona goal 6000-na a ni - kum riat liam ta khan La Liga-a Barcelona goal 5000-na chu Argentine striker hian a lo khung tawh bawk.

Lionel Messi goal khung karah Philippe Coutinho a lang ve zawk a, Liverpool midfielder hlui hian a dan pangngaiin mawi zetin an goal hnihna a khung.

Barca-in an duhtawk mai lo. Hun pek belhah Messi bawk a inlar a, 'ama goal' a khung. Kum 31 mi forward hian Luis Suarez ball pek chu a awmin a la thla a, defender pahnih a bum hnuah Barca goal thumna ni turin a pet lut.

Messi leh goal

Ballon d'Or chawimawina vawi nga dawng tawh Messi-a'n World Cup nomawi a la chawi loh avangin a ropuina a la famkim tawk lo niin an sawi ṭhin a, World Cup 2018-ah pawh last 16 bak a team a hruai thleng thei lo.

Kum 31 mi forward hian La Liga lamah erawh a thiam a la theihnghilh lo tih a pholang ta a, season tluanin Messi pet goal thu kan ziak leh dawn niin a lang!

Messi hian kum 2004-a Barcelona tana a match hmasa ber a khelh hnuah league match 419 khelin goal 385 a khung sak a, inelna hrang hrangah match 638 khelin goal 554 a khung! Top flight football-a Barcelona goal khung 6.4% chu Messi-a khung hi a ni!

La Liga season 15 chhung a zawna goal khung tawh Messi hian goal hnih a khung bakah goal hnih dang khungna remchang a nei bawk - vawi hnih ngawt woodwork a tih per. Vanneih ṭum ni se hattrick a siam ngei ang.

Barca thar

Andres Iniesta-a'n Japan a pan avangin Lionel Messi hi Barcelona captain mawhphurhna pek a ni a, league match hmasa ber­ah hruaitu mawhphurhna lan­tir nghalin captain nih a tlin hle.

Nipui transfer laia lakluh Arthur Melo leh Arturo Vidal ten La Liga-a Barcelona tana an match hmasa ber an khel a, inkhel bul erawh ṭantir an ni lo.

Gremio aṭanga lakluh Melo hi minute 77-naah luhtir a ni a, Bayern Munich aṭanga Spain pantu Arturo Vidal chu hun tawp nan minute nga chiah a awm tawh tihah luhtir a ni thung.

Season hmasaa hliam vanga beisei phak lo Ousmane Dem­bele-a'n inkhel bul a ṭan a, Spanish Super Cup-a goal mawi khungtu forward hian Barca-ah hmun pawimawh a chang chho zel a nih pawhin a mak lo ang.

Messi faktu Valverde

Lionel Messi-a'n goal hnih a khung miau a, inkhelh zawh press conference-a Barcelona coach Ernesto Valverde thusawi pawh season hmasa nen a danglam lo - chu chu Messi fak a ni!

Kum 54 mi manager chuan, "Messi hi chu mi danglam bik a ni a, nitin a che vel kan hmu thei hi kan vannei takzet a ni. Messi-a'n a vanglai hun a hman laia football-a hun kan hmang vete hi lawm hle tur kan ni.

"Hetichung hian Messi hian rin loh lam aṭanga thil mak bik tiin min la barakhaih reng tho a nih hi. Dik takin sawi ila, ka hlimna a thlen loh lai reng reng hi ka hre lo.

"Messi a awm chuan eng­pawh a thleng thei tih i hre tur a ni - ani chuan mi hmuh loh hi a hmu thei tlat bik a ni," tiin a captain a fak duhthawh hle.

Cazorla a lo kir!

October 2016-a Arsenal tan a khelh laia a inhliam hnuah a vawi khat nan Santi Cazorla chuan khelmualah a hmel a inlan ve leh ta a, amah chher liantu Villarreal tan Inrinni zan khan a inlan.

Mahse, a hliam na tak avanga "Ke a i kal leh a beisei­awm tawh lo," tia an hrilh midfielder hian a club hi hnehna erawh a chanpui zo lo a, an khel­muala inlan an ni chungin Real Sociedad lakah 1-2 in an tlawm.

Inkhelh zawha sawi hlawh ber erawh result ni loin Cazorla a ni a, a dam chhunga wheelchair-a hun hmang tawh tur hiala ngaihin professional footballer nun bul a ṭan leh hian lawmpui a hlawh hle.

Cazorla hian a hliam avangin vawi sawm ngawt zaipui a tawk a, Arsenal tana vawi 180 inlana goal 29 khungtu chanchin hian ngaihven a la hlawh dawn chauh niin a lang.