Harry Kane-a'n goal khung ta

Harry Kane-a'n August thla chhungin Premier League-ah goal a khung thei ngai lo. England inter­national hian 'Thiṭin thla anchhia' hi kal pelin goal a khung ta; Inrinni zan khan Fulham lakah goal khat khungin 3-1 in hnehna an chang.

England striker Kane hian August thla chhungin match 14 a khelhah goal a khung lo a, kuminah pawh a match hmasa zawkah a khung loh avangin season dang angin a ze ngai hi a kalpel dawn lo nia ngaih a ni hman.

Mahse, kum 25 mi Kane hi dan reng theih a ni lo, goal bar a tih per hnuah box chhunga a ball chan chu rang taka insiamremin goal-ah a chantir. Spurs tan Kieran Trippier-a'n freekick a pet luh bakah Lucas Moura pawhin a khung bawk.

Nipui bazar laia player lalut lo Tottenham hian match hnih an khelhah point ruk an hmu thei a, Mauricio Pochettino naute hian an match lehpekah chuan Manchester United an lenchilh ang.

Inrinni zan inkhel dangah Everton chuan Southampton 2-1 in an hneh. Goodison Park-ah Arsenal forward hlui Theo Walcott-a'n goal hmahruai a khung bakah Richarlison tauh luh tur a siamsak bawk - pound maktaduai 50 man Richarlison hian league match hnihah goal thum a khung ta.

Everton manager Marco Silva chuan, "Bul kan ṭan ṭha hle a, khatiang khan khel chhunzawm thei ila duhthusam a ni. Second half-ah kan buai hret a, a bik takin tlarhnung lamah insiamrem ngaihna lai a awm, chutihrualin point thum hmuh phu khawpin kan khel a ni," a ti.