Hungary-in thilmak thlentir

Ferenc Puskas Stadium-ah Hungary-in hun tawp dawna Loic Nego leh Dominik Szoboszlai goal hmangin Iceland an lehthal a, 2-1 a chakin Euro 2020 khel turin 

an tling.

Ningani zan inkhelah Iceland-in minute 11-na lekah Gylfi Sigurdsson-a'n freekick aṭangin a khung a, Hungary keeper Péter Gulácsi tihsual liau liau a ni. Minute 88-naah Iceland defender chetsual vangin Loic Nego hmangin Hungary-in siphurh an sut.

Hungary an phur a, injury time minute hnihnaah Red Bull Salzburg midfielder Dominik Szoboszlai-a'n box pawn aṭangin goal kilah tak a pet goal a, Iceland tan siphurh sutna hun a awm tawh lo. Referee-in hun tawp hamrik a ham a, Iceland an ṭap a, Hungary an lawm thung.

Hungary goalkeeper Péter Gulácsi chuan, "Khatiang khan goal ka la chhuah ngai lo. Minute 80 chhung kha chu ngaihtuahna pawh a kal thui khawp mai. 1-1 a nih hma kha chu awm a nuam lo. A tawpah erawh a hlimawm khawp mai," tiin a sawi.

Hungary forward leh captain Adam Szalai chuan, "Sawi tur ka vai e. Inkhel danglam tak a ni a, a tawpa thlin dan kha kan tana duhthusam a ni. Ka rilru put hmang kan lan chhuahtir a, hetiang huna che chhuak tur player ṭha kan nei ve bawk," tiin hnehna an chan dan a sawi ve bawk.

Hungary hi group F-ah Portugal, France leh Germany nen an awm dawn a, hmabak a hautak dawn hle.