Brighton mualah Man United an tlawm
"Player ṭha kan lak loh chuan season harsa tak a ni ang," tiin Premier League 2018-19 season ṭan hmain Jose Mourinho-a'n a sawi a, a thu sawi hi a thleng dik chho dawn niin a lang. Brighton and Hove Albion khelmualah Manchester United chu 3-2 in an tlawm, inkhelh banah captain Paul Pogba chuan an rilru put hmang a dik tawk loh thu a sawi.
Pathianni zan Amex Stadium-a inkhelah Brighton tan Glenn Murray, Shane Duffy leh Pascal Gross ten goal khat ṭheuh an khung, mikhual United lamin Romelu Lukaku leh Pogba hmangin sut ve mah se an si phurh an sut zo thei lo; kumin May thla maia an tlawm tawhna mualah Mourinho naute an tlawm nawn.
Brighton an êng
Minute 25-naah Murray chu United defender karah put chhuakin hnai tak aṭangin a pet lut zeuh a, keeper David de Gea tan dan hman a ni lo. Man United an insiamrem hman lo, minute hnih hnu lekah ven loha awm Duffy chuan box chhung aṭang bawkin an goal hnihna a khung - United lamin goal hnih an phur!
Chawlhlawk hmain Lukaku-a'n kumina a league goal hmasa ber hmangin an si phurh an sut ṭhen; Belgium international striker hian defender Luke Shaw ball pet sawt kang a tauh lut, minute 34-naah goal an neih avangin an beiseina thi ṭep chu chhem nunin a awm thar.
Mahse, Eric Bailly-a'n box chhungah Gross a tihtluk avangin referee Kevin Friend-a'n penalty spot a kawk, ama hlawh chhuah ngei chu an goal thum nan a khung zui bawk - hun tawp dawnah Marouane Fellaini penalty hlawhchhuah chu Pogba-a'n khung mah se an mualphona a hliah khuh zo lo.
Sanchez tel lohna
Alexis Sanchez-a'n kar tluanin team training a nei thei a, mahse Brighton hmachhawn tura zin chhuak zingah a tel lo. Inkhel ṭan hmain Mourinho chuan Sanchez hi a inhliam niin a sawi, Chile international hmun ruakah Anthony Martial dah luh a ni.
French forward hian chak takin ball a tlan luhpui thei ṭhin mah se a hloh fo a, goal zawna shot a neih chhun pawh dan sak a ni. Defender Shaw nen inthlawp ṭha viau mah se hun pawimawh laiah a hmawr an bawk thei lo. Season hmasa khan Brighton laka a chet ṭhat loh vangin Mourinho-a'n a lo sawisel tawh a, a hmun ngaiah beisei a phak lo zui leh chiah.
Kum 22 mi Martial hi minute 60-naah Fellaini hmangin thlak a ni, goal an mamawh hnuah Marcus Rashford leh Brighton tana loan hmanga khel tawh Jesse Lingard te dahluh niin, English duo hian mahni mual hmang thiam Seagulls (Brighton sawina) lakah danglamna an thlen phak tawh bik lo.
Tlarhnung pawp
Manchester United manager Mourinho-a'n nipui bazar laiin Tottenham Hotspur defender Toby Alderweireld leh Leicester City tarhnung dawltu Harry Maguire te bakah, Germany international Jerome Boateng lakluh tumin hma la mah se a hlawhtling lo.
Portuguese manager hian match hnih an kelh tawhah tlarhnung laiah season hmasa lama duh taka a lei pahnih Bailly leh Victor Lindelof te a inkawp tir a, goal li an chhuah. Season hmasa league match bika clean sheet vawi 19 nei thei United hi tun dinhmunah chuan an tlarhnung a phui lo takzet.
Hliam tenau neih vangin Antonio Valencia leh midfielder Nemanja Matic te an la inlan thei lo a, Ashley Young-a'n a khelh ṭhan lohna hmunah buaina a ngah a, player thar Fred pawhin Matic hna thawh ang a la thawk vek thei lo tih a chiang bawk.
A fuh lo
Captain armband hreng chungin Paul Pogba-a'n khelmual a lut a, Barcelona nena sawi zawm lai midfielder hian match hmasa angin penalty khung leh mah se an rilru a inpeih vek loh thu a sawi.
France international Pogba chuan, "Kan khingpuite ai khan chak duhna thinlung kan nei tlem zawk a, chumi chu khelmual chhungah a hmuh theihin a awm. Kei pawh ka bang lo, ka rilru put hmang a dik famkim tawk lo a ni. Hmasawn kan tum tur a ni, kan tan zirlai a nih ngei ka ring.
"1-0 a nih kha chuan a la ziaawm, 2-0 a ni a, 2-1 a ni leh bawk. Goal hnih chhuah tawh hnuah chuan kan khung let a hun tawh, mahse kan lamah a lut leh zawk si, chak phu zawkin hnehna an chang," a ti a, manager Mourinho chungchang an zawhna erawh a chhang lo.