Sub Junior Football C'ship Mizoramin Tripura an sawp

National Sub Junior Football Championship 2018 (North East Zone Qualifying Round) chu nimin aṭang khan Kolasib-ah khelh ṭan a ni a, match hmasa berah Mizoram chuan Tripura 14-0 in an sawp. Kolasib-a artificial turf thara India ram pum huap inelna hmasa berah Mizoram an chak.

Mizoram hi Group A-ah Tripura leh Meghalaya te an awm a, naktuk hian Tripura leh Meghalaya te an inkhel ang a. Mizoramin an group match hnuhnung berah Zirtawpni hian Meghalaya an hmachhawn ang. Group khat aṭangin team khat chiahin final round an khelh dawn avangin Mizoram hi chak chiang mah se an dinhmun a him bik lo.

NE Zone Qualifying Round-ah hian Mizoram hi coach Samuel Lalrinngheta, manager F. Lalmuankima leh technical director Zorammuana ten an enkawl a, nimin inkhelah hian Rohlupuia leh Vanlalmalsawma ten hattrick an siam a, Vanlalmuanpuia leh substitute Isak Zomuanpuia ten goal hnih ve ve an khung bakah C. Lalhunmawia, Jacob Lalhmangaiha, Lalfakzuala leh Malsawmhlua ten goal khat ṭheuh an khung a. Mizoram keeper Lalhruaitluanga'n goal a chhuah lo.

Result leh Fixtures
Nimin Inkhel Result–Group A
Mizoram 14–0 Tripura
MIZ : Rohlupuia 28', 42, 50'; Vanlalmalsawma 37', 39, 43';
   Lalfakzuala 52'; Vanlalmuanpuia 54', 83'; Malsawmhlua 64';
   C. Lalmuanpuia 67'; Isak Zomuanpuia 85', 86';
   Jacob Lalhmangaiha 90+2'
Vawiin Inkhel Tur–Group B
Assam 2:30 PM Arunachal Pradesh
August 22, Nilaini–Group A
Tripura 2:30 PM Meghalaya
August 23, Ningani–Group B
Manipur 2:30 PM Arunachal Pradesh
August 24, Zirtawpni–Group A
Meghalaya 2:30 PM Mizoram
August 25, Inrinni–Group B
Manipur 2:30 PM Assam