Hazard a chhuak dawn lo

Real Madrid nena sawi zawm hlawh tak Eden Hazard chuan tun nipui transfer-ah Chelsea a chhuahsan loh tur thu a sawi a, Chelsea fan-te hahdam takin an awm thei ta.

Premier League-ah chuan inelna ṭan a nih hmain transfer bazar khar a ni tawh a, club ten player an lalut thei tawh lo. Mahse, August 31-ah European transfer window khar a ni dawn chauh a, English top flight club ten player lalut thei tawh lo mah se a hralh lam erawh an la kalpui thei reng thung.

Kum 27 mi forward chuan, "He hmunah hian ka hlim a, ka hma hun zela ka awm dan tur erawh tun aṭanga kum khat emaw kum hnih hnuah chuan a chiang mahna. Kuminah chuan kan chhuak dawn lo chiang. World Cup zawha ka thusawi kha mi zawng zawngin an hria a, he hmunah hian ka hlim a ni," tiin a sawi.

Belgium international chuan Chelsea dinhmun sawichiang nghalin, "England-ah player lakluh a theih tawh lo a, club tan pawh min thlaktu tur awm loa min chhuahtir chu thil tih chi a ni lo a ni," a ti a, an club dinhmun a ngaihtuah tel thu a sawi.

Hazard hian tun season Premier League match hnih chu bench aṭangin bul ṭan ve ve mah se assist vawi hnih a nei leh der tawh a, Arsenal laka 3-2 a an chak ṭuma fan-ten an lawmna chu thlirkirin, "Fan-te hian min la hmangaih reng a ni," a ti bawk.

Hazard hian kum 2012 khan French club Lille aṭangin Chelsea hi a pan a, match 302 a khelh sak tawhah goal 89 khung sakin Premier League (2), FA Cup (1), League Cup (1) leh Europa League (1)-ah te a champion pui tawh.