Champion lai leh Champion rinkai ber Manchester City

Manchester City-in khelh dan nghet an nei tawh a, Premier League match hnih an khelh aṭangin champion lai hi champion tura rinkai ber an ni nghal.

Pathianni zan khan Pep Guardiola naute hian Etihad Stadium-ah Huddersfield 6-1 in an sawp a, Sergio Aguero chuan hattrick siamin Gabriel Jesus leh David Silva ten goal khat ve ve an khung a, Terriers defender Terence Kongolo chuan an lamah a tilut. Mikhual tan hian Jon Gorenc Stankovic chuan goal thum an chhuah laiin goal khat a khung ve bawk.

Aguero leh Jesus

Pep Guardiola chuan inkhelh ṭan hmain Gabriel Jesus a luhtir tur thu a sawi a, hei hian Aguero bench-ah a dah dawn tih a kawk lo. Brazilian leh Argentine striker ten City tlarhma an mawi a, Huddersfield tlarhnung tan manghchhia an thlen.

City-in ṭan phat aṭangin na takin an nawr a, khawl uluk taka enkawl ang maiin player tin chuan an thawh tur ṭheuh chu nal takin an thawk vek a. David Silva pawh kum enin upa deuh mah se talent nei ṭha bik nei player a nih lantirin Terriers defender a bum phar nasa ṭhin hle.

Huddersfield-in hun engemaw chen chelh thei mah se minute 25-naah goalkeeper Ederson chuan tlarhmaa awm Aguero chu a va pe fuh chat a, Argentine striker hian Terriers defender leh keeper chu chhaih pharin 'cool' zetin goal-ah a pet lut. Brazilian keeper chu Premier League-a City keeper zinga assist nei hmasa ber a ni a, Huddersfield keeper Ben Hamer erawh a rawn chhuah hma hret avangin dem theih a ni thung.

City an huang tau zui a, minute 31-naah Gabriel Jesus chuan goal hnihna khungin minute li hnuah Aguero-a'n a pet goal leh bawk. Argentine striker goal khung hi keeper Ben Hamer tisual bawk mah se left wing back Benjamin Mendy ball pet thiam zia hmuh hmaih theih a ni lo.

First half-ah City-in goal thum an khung a, Huddersfield-in minute hnih la awmin Stankovic hmangin an siphurh an sut ṭhen a, mikhual beiseina siamtu ni thei mah se Pep Guardiola an talbuai phah lo.

City an mawi

Second half minute thumnaah David Silva-a'n mawi takin freekick a khung a, mual vei lam aṭangin Mendy ball vawrh luh chu Aguero-a'n hattrick siam nan a khung leh bawk. French defender hian inhliam vanga tha thawh mang loin Premier League leh World Cup nomawi a chawi a, tunah erawh a dam ṭha tawh - Champions League semifinal-a Monaco semifinal thlenpuitu kha a la ni reng. Mendy hian tun season-ah assists vawi thum nei a tawh a, season liam taa Fabian Delph, Danilo leh Oleksandr Zinchenko te aiin tun season-ah assist a ngah der tawh.

Mendy hian Huddersfield lamah hian cross vawi 12 a nei a, tun season-a match khata cross nghah ber a ni a, French wing back cross hi a tam satliah lo a, Terriers tlarhnung tibuaitu vek tiin a sawi theih. Pep Guardiola-a'n hun tawp lamah pawh tlarhma tichak turin Leroy Sane a la luhtir thei a, German winger hian ṭha taka lalutin a thawhrah zarah Terence Kongolo chuan an lamah minute 84-naah a tiluh phah.

City an thiam

Terriers boss David Wagner chuan, "City chu team dang daih an ni a, an thiam takzet a, keini lam kan ṭhat dan ber dawttuin kan khel bawk si," tiin City an thiam tih a pawm rualin an khelh ṭhat tawk loh thu a sawi.

City manager Pep Guardiola chuan, "Season liam ta khan Huddersfield khan defender panga an hmang a, chuvangin tlarhmaah striker pahnih kan dah. Nikum aiin run season chu kan ṭan ṭha zawk a, minute 90 chhung kan khel ṭha a ni," tiin an khelh danah a lungawi hle.

Premier League champion lai City hian an thiampuipa Kevin de Bruyne chu inhliam vangin an chhawr thei lo a, Belgian playmaker awm loh hi a lang lo reng reng. Hei chauh hi a ni lo, City tan bul ṭantu zingah Kyle Walker, Raheem Sterling, Leroy Sane leh Riyad Mahrez te an tel lo.