Fury leh Wilder hmachhawn hun chiang hnai

British boxer chanchin ngah Tyson Fury leh WBC heavyweight champion Deontay Wilder an inhmachhawn dawn tih a chiang tawh a, a hun leh hmun tur pawh a chiang hnai.

Fury promoter Frank Warren chuan, "Inrem ngaihna lai zawng zawngah inremna siam a ni tawh a, tun dinhmunah chuan an inhmachhawnna hun leh hmun tur chiah la chiang lo awmchhun a ni.

"Josh Warrington leh Carl Frampton te an inhnek dawn bawk avangin he fight tur ngaihtuah chunga a hun siamrem a ngai a, November emaw December-ah a nih a beiseiawm," tiin a sawi.

Hetihlai hian Wilder chuan boxer pahnih inbiak ṭanna chu social media pakhat instagram a nih thu a sawi. American fighter chuan, "June 22 khan Fury hian instagram-ah min rawn bia a, 'Hmachhawn che ka duh, khawvela fight ropui ber a ni dawn a ni,' tiin min rawn bia.

"Kei pawhin Tyson Fury hmachhawn hi ka duh fo ṭhin a, ani nena kan inhmachhawn thei ta tur hi ka tan chuan malsawmna a ni," tiin Fury chu rei tak a chawlh hnua lokir ni mah se a la dah san reng thu a sawi.