Halep hnehin Bertens champion

Kiki Bertens chuan Simanoa Halep-i'n championship point a hmuh tawh pawt thla lehin Cincinnati Masters nomawi a chawi a, world number 1 Halep hi final-ah vawi thum a chak lohna chiah niin - 2015 leh 2017 khan pahnihna a lo ni tawh bawk.

Pathianni zana final inkhelah kum 26 mi Bertens hian darkar hnih leh minute nga chhungin 2-6, 7-6 (8-6), 6-2 in hnehna a chang. Dutch player zingah 2006 hnu lama WTA/ATP hardcourt tournament champion leh thei hmasa ber a ni.

World number 17 Bertens chuan, "Ka lawmna sawifiah nan hian ka ṭawngkam thiamin a tlin lo," tiin tennis a khelh tawh china a nomawi chawi ropui ber chungchang a sawi. French Open champion Halep pawhin a khel ṭha zawkin hnehna a chang tih a pawm a, "Ka chau deuh a ni, chutih rualin chawlhkar nuam tak a ni," tiin a sawi.