Real tan 'star' thar Gareth Bale

Pathianni zan khan Real Madrid chuan tun season La Liga-a an match hmasa ber an khel a, an mikhual Getafe chu harsatna nei loin 2-0 in an hneh.

Real tan Gareth Bale chuan innghahna tlak a nihzia pholanna goal a khung a, Dani Carvajal chuan goal khat a thawh ve bawk - minute 90 chhungin Getafe hian Real an chhaih buai ve meuh lo.

Julen Lopetegui-a nauten 78% zet ball an chang a, goal-ah vawi 10 ngawt shot an nei bawk. Getafe-in Real goal-ah pet luh tumin vawi nga chiah shot an nei thung a, target-a shot an neih zat phei chu vawi khat chiah a ni.

Real Madrid hian tun season-a an competitive match hmasa berah Atletico chu 2-4 ngawtin an ngam lo a, Pathianni zanah erawh an insiamṭha tawh tih hmuh turin a awm.

Tlarhma 'thar'

Real Madrid boss Lope­tegui-a'n pre-season lama a lo enchhin tawh angin tlarhma lamah Gareth Bale, Marco Asensio leh Karim Benzema te a inkawp tir a, player pathum hi Real tan season tluanin an inkawp a rinawm.

Lopetegui hian rinlawk ang ngeiin 4-3-3 formation a hmang a, midfield-ah Toni Kroos leh Isco te chu hmuh turin an awm bawk. Minute 20-naa Real hmahruaina goal khungtu erawh Dani Carvajal a ni a, kum 26 mi right back hian Bale-a ball cross goalkeeper David Soria hnek let chu a lo tauh lut.

Bale-a'n Real goal hmahruai a 'thawhchhuah' hnuah post a tauh per a, minute 51-naah erawh a vanduai nawn tawh lo. Welsh forward hian Asensio ball cross chu dive chungin a tauh lut a, goal mawi leh ṭha bik a ni.

Asensio-a'n second half-ah goal khungna remchang a nei ve bawk a, mahse a hun ṭha neih hi post tih per nan a hmang. Inkhel pumpui thlir erawhin Real ṭantu tan chuan Serie A lama a match hmasa bera goal khung lotu Cristiano Ronaldo 'ngaihawm' loh zan tak a ni.

Innghahna Bale

Zinedine Zidane-a'n Real Madrid a enkawl lai kha chuan Gareth Bale-a'n hmun pawimawh a chang phak lo a, nipui transfer-ah chhuak tura ngaih a ni.

Mahse, Zidane a chhuak a, Cristiano Ronaldo a chhuak ve bawk. Coach thar Julen Lopetegui a lo lang a, chhuak tura sawi Bale a nghet sawt.

Spanish manager hian Bale chu Ronaldo hmun ruak hnawhkhattu tur a nih thu a sawi a, season hmasa lawka bench-a ṭhu ṭhin khan team 'innghahna' mawhphurhna a nei nghal.

Gareth Bale-a'n a pu rinna a taka chantirin goal a khung nghal a, Wales international hian a dam ṭhat phawt chuan khawvela forward ṭha ber zinga mi a ni tih khelmualah a lantir a, a che vel a hmuhnawm hle.

Courtois aiah Navas

Chelsea goalkeeper hlui Thi­baut Courtois-a'n Real Madrid pan a duh avangin London club-a a awm laiin club training pawh a zawm duh lo a, Blues-in pound maktaduai 35-in an chhuahtir.

Real goalkeeper a nih hnu­ah Belgium international hian, "Hlawh tam zawk hlawh turin hmun dang aṭang pawhin sawm­na ka hmu a, mahse Real-in min duh tih ka hriat khan khawdang ka hawi tawh lo. He club tana khelh hi ka naupan laia ka mangphan chu a ni," tiin a sawi.

Mahse, Courtois tan beisei ang ngawt erawhin kalkawng a awlsam dawn lo. UEFA Super Cup-ah Real goalkeeper nisa Keylor Navas chu a aiah thlan a ni tawh a, Costa Rican keeper hian goal li ngawt a chhuah chungin Getafe lakah pawh si ban nghak tura thlan a ni.

Navas hian Getafe lakah hna a nei lo - minute 90 chhungin a zawnah vawi khat chiah pet a ni a, harsatna nei loin a dang. Real-in Europe-a ro an rel chhung zawnga an goalkeeper rinrawl nek chhuak tur chuan Courtois tan thawhrim lehzual a ngai dawn niin a lang.

Modric a inlan

World Cup-ah Croatia chu a vawi khat nan final a luhpui a, khawvela player ṭha rual fuankhawmna hmunah Best Player atan thlan a ni bawk - a chanchin kan sawi hi Real midfielder Luka Modric a ni.

Inter Milan chuan Croatia international hi lakluh tumin an hel a, Real Madrid chuan Italian club hian an phalna la loin an player hi an rim nia sawiin FIFA hnenah an hek hial!

Pathianni zanah erawh Modric a inlan a, kum 32 mi midfielder hi minute 71-naah Dani Ceballos thlak turin luhtir a ni a, sum tamna Premier League leh Serie A lamah transfer bazar khar a nih tawh bawk avangin a chhuak dawn lo niin a lang.

Modric hian kum 2012 khan Tottenham Hotspur aṭangin Real hi a pan a, match 259 khelh sak tawhin champion theihna zawng zawngah chuan a champion pui vek tawh.

Bale faktu Lopetegui

Gareth Bale-a'n season thum chhung chu a zawnin league match hmasa berah goal a khung tawh a, Lopetegui-a'n Welsh forward hi a fak hle.

Kum 51 mi manager chuan, "Gareth khan a khel ṭha takzet a ni. Chutihrual chuan team pumpui chungchang sawi ka duh a, an vai khan an khel ṭha em em vek a ni," a ti.

Spain coach hlui hian Zidane-a'n a chhawr ngai meuh lo Dani Ceballos chu inkhel bul a ṭantir a, "Ceballos hi player ṭha tak a ni a, a ṭhan zel theih nan kan pui dawn a ni," tiin Spanish rawltharin hmabak êng tak a neih thu a sawi.

Real hian season thum chhung chu a zawnin Cham­pions League nomawi an chawi a, Zidane-a'n a ban chhan a sawi zingah La Liga an champion loh a tel a, Lopetegui hoa league nomawi chawi an beisei ang.