Indian Super League bazar a lun
India rama club football inelna ngaihhlut Indian Super League club te an bazar chhunzawm zel. ATK chuan season thar atan Cameroon defender Andre Bikey an lalut a, ram tana vawi 25 inlan tawh defender hi NorthEast United, Pune City leh Jamshedpur tan pawha lo khel tawh a nih avangin Indian football-ah a mikhual lo.
Hetihlai hian Pune City chuan season hmasaa NorthEast United tana khel Martin Diaz an lalut ve bawk a, Uruguayan defender hian an ram bakah Argentina, Spain leh Romania lamah te pawh lo khel tawhin tawnhriat a nei ṭha hle.
Diaz ang thoa Uruguayan mi midfielder Matias Mirabaje chuan Delhi Dynamos chhuahsanin Mumbai City FC a zawm ve bawk. Uruguay under 20 tana lo inlan tawh midfielder hi an ram club lar Nacional leh Argentine club ṭha San Lorenzo tan pawha lo khel tawh a ni.
Tun hnaia ISL transfer-a player langsar bera chhal ngam erawh Andrija Kaluderovic a ni a. Kum 31 mi Serbian striker hian Delhi Dynamos a zawm a, ISL ti hmuhnawm thei tura beisei zingah a tel.
Serbia tana vawi thum inlan tawh striker hian Serbian club lar Red Star Belgrade tan 2010-11 khan a career-a a hun duhawm bera chhal ngam tawngin match 33-ah goal 20 a khung a, league top scorer a nih bakah Team of the Year-ah a lang bawk.