India team an chak lo

18th Asian Games khelh mekah India hmeichhe badminton team chu nimin khan Japan hneh loin an tla. India hian Asian Games hmasa khan bronze medal an dawng a, kuminah erawh seeded pakhatna an hmachhawn avangin quarterfinal pawh an paltlang zo lo, 3-1 in an chak lo a ni.

India tan Olympic silver medalist Sindhu chuan Yamaguchi lakah 21-18, 21-19 in hnehna a chang, world number 3 hian hnehna chang turin minute 41 bak a mammawh lo.

Match hnihnaah Japan lamin Yuki Fukushima leh Sayaka Hirota te ṭangdun hmangin N Sikki Reddy leh Arathi Sunilte chu 15-21, 6-21 in an hneh a, ram pahnih te dinhmun chu 1-1 a ni chiah.

Inkhel pawimawh takah ram pahnihin an player neih ṭhat an chhawp chhuak. India tan Saina Nehwal a inlan laiin, Japan lamin Nozomi Okuhara an hmachhuan thung. Saina hian match point vawi li ngawt inchhanhim thei mah se, a vawi nganaah erawh a him zo lo; darkar khat leh minute 11 zet an inkhelh hnuah 11-21, 25-23, 16-21 in Saina a tlawm.

India-in match hnih an hloh tawh avangin chak ngei ngei ngaih tawhnaah Sindhu leh Ashwini Ponappa te an inkawp a, mahse 13-21, 12-21 in Misaki Matsutomo leh Ayaka Takahashi te ṭangdun lakah an chak lo thung.