Match hmasa berah Inter Milan chak lo nghal

Serie A champion tum Inter Milan chu an match hmasa berah an chak lo nghal. Pathianni zan in­khelah Inter hi Sassuolo lak­ah 1-0 in an tlawm a, goal awmchhun hi Domenico Berardi-a'n penalty aṭanga a khung a ni.

Inter hian champion lai Juventus lak aṭangin league nomawi chhuhsak an tum a, nipui bazar laiin Luciano Spalletti chuan Radja Nainggolan, Stefan de Vrij, Matteo Politano, Lau­taro Martinez leh Kwa­d­­wo Asamoah te a lei tawh. Mahse, beisei angin bul an

ṭan fuh lo - ball chang hnem mah se a pawimawh ber goal an khung thei lo.

Inter Milan manager Spalletti chuan, "Hun ṭha kan hlah hnem hle, a hun­ah kan la hriam tawk lo a ni. Sassuolo khan counter attack aṭangin min bei a, kan tlarhnung pawh an ṭhiat zeuh zeuh, kan goal chhuah chhan erawh penalty a ni. Ka nauten hmasawnna tur lai an la ngah hle," tiin a sawi.

Spalletti naute hian Pa­thianni zanah Torino an mi­khual dawn a, hnehna chang­tu Sassuolo-in Cagliari an lenchilh thung ang.

Inkhel dangah AS Roma pawhin hnehna chang turin vanneihna an mamawh. Roma hian hun tawp dawna Manchester City striker hlui Edin Dzeko goal khat hmangin Torino 1-0 in an hneh hram. Kai thar Parma pawhin goal hnih faiin hma hruai mah se an tlarhnung a phui lo a, an mikhual Udinese nen 2-2 in an inhnehtawk.