Arsenal laipui pu Aubameyang

Pierre-Emerick Aubameyang-a'n Arsenal tan Premier League goal 50 leh 51-na a khung zanah Norwich City 4-0 in an sawp a, inkhelh banah manager Mikel Arteta chuan a captain hian contract thar a ziah ngei a beisei thu a sawi.

Gabonese striker Auba hian EPL goal 50 khung tling tur hian match 79 bak a mamawh lo, Gunners player zinga match mamawh tlem ber a ni. Andy Cole (65 games), Alan Shearer (66), Ruud van Nistelrooy (68), Fernando Torres (72) leh Mohamed Salah (72) te hnungah a hming a ziak.

Emirates Stadium-a inkhelah Norwich goalkeeper Tim Krul a chesual langsar, ball pet chhuah a tum chu Aubameyang-a'n hnaihchilh hmanin ho lam takin goal an chhuah. Auba hian midfielder Granit Xhaka khung tur a siamsak zui, chawlhlawk laiin 2-0 in hma an hruai.

Table mawngphah luahtu Norwich tlarhnung a pawp nasa, ven tur Auba an ven hmaih avangin Gunners captain hian awlsam takin an goal thumna a khung. Substitute Cedric Soares chuan mual a luh aṭanga second 229 hnuah club tana a goal hmasa ber chu box pawn aṭangin a khung bawk.

Tla tura ngaih Norwich an vanduai, midfielder Ben Godfrey-a'n woodwork a tihper dawp a, Kenny McLean-a free kick  ṭha tak chu keeper Emiliano Martinez chuan a lo dansak hram. Daniel Farke naute hi EPL aṭangin la tla chiah lo mah se him tur chuan thil mak a ngai tawh.

Arsenal captain Pierre-Emerick Aubameyang hi season kal laiah EPL top scorer a ni mek, season thar lo awm tur daih chauh hi contract a neih tawh avangin a hma hun a chiang lo - nomawi chawi a chak thu a sawi tawh avangin contract pawh a la ziak lo nia ngaih a ni.

Gunners manager Arteta chuan, "Hun rei zawk atan a cham ngei ka beisei. Kan inbiak apiang hian a hlim em em reng, he hmunah hian chhungkua in hlim takin an awm," a ti. A captain hi goal khung thei bik a nih avangin chelh ngei a duh.

North London club hian point thum an hmuh bakah lawmna dang an nei bawk. Rawlthar khel ṭha thei tak Bukayo Saka chuan hun rei tak chhung atan contarct a ziak thar, kum riat mi chauh a nih lai aṭanga an kawl English player hian Arteta kaihhruaina hnuaiah hmun pawimawh a chang.