Sports Minister in MFA Khelmual a tlawh

Sports Minister Robert Romawia Royte chuan nimin khan Sairang Dinthara MFA khelmual a tlawh a, FIFA malsawmna dawng thei khawpa MFA te thawhrimna chu fakawm a tih thu leh an hlawhtlinna chu a lawmpui thu a sawi. 

Sports minister chuan football chu Mizoram a industry lian ber a nih thu sawiin kum khatah kan player ten vaibelchhe tel an hlawh chhuak thei a, hetiang hi Mizorama industry dang sawi tur a vang hle niin a sawi a; ISL-ah Mizo tlangval 33 zet an awm dawn thu leh I League player pawh ṭhahnem tak an awm leh dawn thu  a sawi. 

MFA hruaitute chuan khelmual kianga tribal girls hostel din a nih theih nana minister puihna leh finchhuahna chu lawmawm an tih thu an sawi a; Sports minister a nih hma atang tawha mahni insengsoa infiamna atana a tha thawh zozaite chu fakawm an tihzia an sawi lang bawk.

Sports minister hian Mizoram hmun hrang hranga football khelmual phullem phah mek a nih thu leh sports zirna hmunpui buatsaih chhoh zel dante a sawi lang bawk.