Nadal leh Thiem an awmdun

Mipa tennis thiam zual pariat inelna ATP Finals 2020 chu Pathianni zan aṭangin khelh ṭan a ni dawn. A vawi khat nana champion beiseitu Rafael Nadal leh US Open champion Dominic Thiem te chu 'Group London 2020' chhunga dah dun an ni.

Player pariat hi group pahnih - Group London 2020 leh Group Tokyo 1970 te in ṭhenhran an ni. Group pakhata awmte an inkhel kual vek hnuah a sang pahnih ten semifinal an lut ang.

Nadal leh Thiem bakah hian champion lai Stefanos Tsitsipas leh Andrey Rublev te an awm bawk a, a ṭha zual zingah pawh anni awmkhawmna group hi ngaihnawm zawk tura ngaih a ni a, semifinal lut tur rin thiam a harsa hle.

World number 1 Novak Djokovic chu 'Group Tokyo 1970' lamah a awm thung. Serbian star hian a vawi ruk nan champion a tum dawn, nomawi a chawi thei a nih chuan record nei ṭha Roger Federer (6 titles) a nih rual chiah ang.

O2 Arena, London khawpuia inelna neih turah hian Federer chu inlan turin a dinhmun a ṭha tawk. Mahse Swiss star hi hliam vangin a season a tawp tawh, a hmunruakah world number 9 Diego Schwartzman a inlan theih phah dawn a ni.