Palace khelmualah Liverpool an chungnung
Premier League nomawi chawi tura Manchester City nena inel ber tura ngaih Liverpool-in beisei an nihna a tak ram an chantir zel - Thawhṭanni zan khan Crystal Palace chu 2-0 in an hneh.
Liverpool tan James Milner chuan penalty aṭangin goal hmahruai a khung a, Sadio Mane chuan hun pek belhah Reds goal hnihna a khung ve bawk.
Palace defender Aaron Wan-Bissaka chuan hun tawp nan minute 15 chauh a awm tawh tihah red card a hmu a, mualneitu team-in player 10 lek nichungin inkhel an khar.
Premier League club lian zingah Liverpool bakah Manchester City, Chelsea leh Tottenham Hotspur ten point ruk ṭheuh an hmu tawh a, Manchester United-in point thum chiah an la neih laiin Arsenal erawh point nei loin an awm mek.
Thih nge tlan!
Liverpool manager Jurgen Klopp chuan, "Tun ang hunah hian player te an nguai ṭhin a, fuih phur an mamawh lai tak a ni. A chang chuan manager thinrim tak hnen aṭangin "Tlan zel nge thih in duh?" tia vauna hi an mamawh chang a awm a ni," a ti!
Klopp-a thusawi zawmin Liverpool player an tlan tam a, counter attack-ah an hlauhawm ṭhin hle. Hetihlai hian season hmasaa goal 44 khungtu Mohamed Salah-a'n ngai a la awh lo niin a lang a, goal hmaah a hriam tawk lo.
Hetihchung hian Liverpool goal hnih hi Egyptian forward thawhchhuah ve ve erawh a ni tho. Penalty hmasa hi Mamadou Sakho-a'n a tih tluk avanga a hlawhchhuah a ni a, Mane goal khung hi a siamsak a ni bawk.
Kum 26 mi forward hian goal khungna remchang vawi engemaw zat a nei bawk a, mahse ṭum dang anga a hriam tawk loh avangin a hun ṭha neih goal-ah a chantir thei ṭhin lo.
Hodgson a lawm lo
Palace-in penalty an chawi bakah hun tawp lamah an player an chan bawk a, Liverpool boss hlui leh Palace manager Roy Hodgson chu referee thutluknaah a lungawi lo.
Manager tawnhriat ngah tak chuan, "Kha aia result ṭha zawk nei tur khan kan khel ṭha tawk a ni. Ka ngaihdanah chuan penalty kha a pekna tur a ni lo. Result ṭha tak nei tur kha referee thutlukna dik tawk lo avangin kut ruakin kan awm a ni," a ti.
Premier League hi Europe-a top five league an tih zingah video assistant referee (VAR) hmang lo awmchhun an ni a, sawiselna hi chu a la awm zel dawnin a lang. Hodgson hian an red card chawina erawh a pawm thu a sawi thung.
England boss hlui chuan, "Wan-Bissaka khan tih tluk hrim hrim tum ni lo mah se an intawn fuh avangin a ti tlu a, a tawh fuh ngei bawk avangin red card tur chu a ni. Ka defender khan a khel ṭha tak zet a, Salah dang tur khan a theihna zawng zawng a pe a ni," a ti.
Palace ral Liverpool
March 31 khan Palace hian 1-2 in Liverpool hi an ngam lo a, hemi hnua Premier League match sarih an khelhah erawh an tlawm leh tawh lo. Hei vang hian Reds-in an match hmasa berah West Ham chu 4-0 in sawp mah se Palace lakah awlsam taka chak tura beisei an ni lo.
Palace-in an ti thei viau a, Andros Townsend-a'n kawh zeta a pet chuan bar a per a, Luka Milivojevic-a'n free kick hmangin Liverpool fans thin phu a ti rang a, Wilfried Zaha-a'n chance hlauhawm a nei ve reng bawk.
Christian Benteke erawh a club hlui lakah dah bo ang hlauh a, red card a hmu chungin Wan-Bissaka khel erawh a pangngai viau - Palace hian draw result tal pawh hlawh chhuak ni se thil awm lo a ni hran lo.
Hodgson chuan, "Liverpool kha kan nawr na em em a, a nihna dik takah chuan first half kha 0-0 a khar tur kan ni a, chutiang tak chuan thil thleng se chuan Reds tan second half kha harsa lehzual tur a ni," tiin an chak zo lo chu a ui hle.
Liverpool leh champion!
Match hnih chauh an la khel a, hetichung hian khawthlang media te chuan Reds chu champion thei turin an tarlang leh der tawh - Klopp ngaihdan erawh a ni lo.
German coach chuan, "Champion sawi nan chuan a la hma mah mah a ni. Champion tih lam hian ka ngaihtuahna a la luahphak lo hrim hrim.
Match hnih chauh kan la khel a, tunah hian engmah sawi a la hun lo. In duh apiang sawi ho ula, mahse min hnuh luh ve kher tum suh u," tiin amah kawmtu media te a chhang!
Liverpool hian match hnih chauh la khel mah se season dang ai chuan an zia tawh zawk tih a chiang - tlarhnung an buai fo ṭhinna chu goalkeeper Alisson leh Virgil van Dijk hmangin chinfel a ni mek a, Van Dijk hian Palace lakah ringawt pawh vawi riat ngawt clearance neiin vawi 79-a pass zinga vawi 73 chu a pass dik.
# Team Pld W D L GF GA GD Pts
1 Manchester City 2 2 0 0 8 1 7 6
2 Liverpool 2 2 0 0 6 0 6 6
3 Chelsea 2 2 0 0 6 2 4 6
4 Watford 2 2 0 0 5 1 4 6
5 Tottenham Hotspur 2 2 0 0 5 2 3 6
6 AFC Bournemouth 2 2 0 0 4 1 3 6
7 Everton 2 1 1 0 4 3 1 4
8 Leicester City 2 1 0 1 3 2 1 3
9 Manchester United 2 1 0 1 4 4 0 3
10 Crystal Palace 2 1 0 1 2 2 0 3
11 Brighton & Hove 2 1 0 1 3 4 -1 3
12 Newcastle United 2 0 1 1 1 2 -1 1
13 Southampton 2 0 1 1 1 2 -1 1
14 Wolverhampton 2 0 1 1 2 4 -2 1
15 Burnley 2 0 1 1 1 3 -2 1
16 Cardiff City 2 0 1 1 0 2 -2 1
17 Arsenal 2 0 0 2 2 5 -3 0
18 Fulham 2 0 0 2 1 5 -4 0
19 West Ham United 2 0 0 2 1 6 -5 0
20 Huddersfield Town 2 0 0 2 1 9 -8 0
Inkhel Chhehvel
# Mane-a'n Premier League-a Palace a hmachhawn hnuhnung vawi riatah vawi ruk goal a khung a, league-ah chuan Palace a ngam ber.
# Liverpool-in Thawhṭanni Premier League-ah vawi 34 hnehna an chang ta a, anni aia chak hnem chu Man Utd (43) leh Arsenal (36) an ni.
# Reds hi Premier League-a an match hnuhnung vawi 10-ah vawi khat chiah a tlawm a, vawi ruk chakin vawi thum an khingpui a inhnehtawkpui.
# Hodgson tan Premier League-a a vawi 100 tlawmna a ni. Vawi 87 a chak a, vawi 65-a khingpui a inhnehtawkpui.
# Wan-Bissaka kha kum 20 leh ni 267 mi a ni a, Premier League-a red card hmu thei naupang ber a ni.
# Milner hian Premier League game 48-a goal a khungin a team an la tlawm ngai lo - vawi 38 chakin vawi 10 an khingpui an inhnehtawkpui.
# Milner-a'n Premier League-a a goal khung hnuhnung pariat chu penalty aṭang veka a chhuih luh a ni a, hetianga penalty chhuih lut tluang hi an la awm ngai lo.