India fanu rangkachak Vinesh Phogat

Hmeichhe awm nem zawk tan infiamna huang ṭhenkhatah din chhuah a harsa ṭhin, chhan hrang hrang vangin India nula ten wrestling huangah hlawhtlinna lian an chang tam tawk ngai lo. Tunah erawh thawnthu a danglam tawh, Vinesh Phogat-i chu Indian nula zingah Asian Games-a gold medal la thei hmasa ber a ni ta.

Thawhṭanni khan Vinesh hian 50kg category huangah Japan nula Yuki Irie chu 8-2 a hnehin a champion a, Asiad-ah (Asian Gmaes sawina pakhat) India nula ten an la tih theih ngai loh chu a rawn ti thei. Kum 23 mi Vinesh-i'n pakhatna ni tur hian harsatna a tawk lo, a khingpuiin point hnih a hmuh ve pawh hi ama tih sual vanga an paih sak chauh a ni.

Gold Medal

Balali, Haryana-a piang Vinesh chuan hnehna a chan hnuah gold medal lak chu a thil tum lian ber a nih thu a sawi, "Asia level-ah chuan silver pali ka nei tawh, ka tum ber chu gold medal lak kha a ni" tiin a sawi.

Final thlir kirin Vinesh chuan, "Japanese nula kha infiammi ṭha tak a ni a, chutih rualin min beihna tura a ruahmanna kha ka hrethiam hle. A tir lamah nasa taka hmahruai nghal ka tum ang ngeiin ka ti thei a, ka ruahmanna chu a hlawhtling," a ti.

Asian Games hnuhnung zawkah khan Vinesh hian bronze medal a la tawh a, Commonwealth Games hnuhnung pahnih–2014 Glaslow leh 2018 Gold Coast-ah te khan gold a la tawh; India nulate hlawhtlin theih lohna Asiad-ah pakhatna a neih leh tak avangin a sulhnu hi hriatreng a ni tawh dawn.

Thawhlehna

Rio Olympic 2-16-ah khan beiseina sang tak nen Vinesh a inlan, India ram pawhin a fanu chungah beiseina a nei sang bawk. Mahse, China nula Sun Yanan nen quarterfinal an khelh laiin a hliam a, beiseina a thamral zui bawk.

Coach Mahavir Singh Phogat kaihhruaina hnuaia khel Vinesh chuan, "Ka tan chuan hliam na tak tawrh hnua rawn kir chu a awlsam lo, rilru leh taksa pawh chu a hah hle. Mahse, ka hliam tawrhna aṭang khan ṭha zawkin ka rawn kir theih phah a ni.

"Wrestling hi ka naupan lai aṭanga ka tuichilh tawh a ni a, hlawhtlinna ka chan theih nan hian thil hautak leh hrehawm tam tak ka tuar chhuak. Hringnunah hian thil atthlak taka ka tih chang a awm bawk, chungte chuan rah ṭha a chhuah chang a awm bawk," tiin a sawi.

Medal dang

Nimin tlai thleng kha chuan India-in medal pariat a la tawh a, heng zinga pathum chu gold an ni. Wrestling huangah gold pahnih niin, a dang pakhat hi shooting-ah a ni thung–India hian infiamna chi hrang 36 huanga inlan turin infiammi 572 a tir chhuak a ni.

Ram 45 inlan zingah China chuan gold 19 la tawh, a pumpuiah medal 41 an la tawh a, hmahruaitu an ni mek. China hnungah hian Japan (8 gold medals), South Korea (5) leh a thlengtu Indonesia (4) te an awm a, India hi pasarihna a ni mek–inelna hi chhun zan zawma neih reng a nih avangin medal lak zat hi a danglam ve reng.