Federer-a'n Nadal a hnaih

Mipa tennis thuneitu sang ber Association of Tennis Professionals (ATP) chuan Thawhṭanni zan khan world ranking thar a tichhuak a, Rafael Nadal chuan point 10,040 hmuin pakhatna dinhmun a la luah.

Kar hmasa chhung khan Nadal-a'n inelna a hmachhawn lo a, a elpui Roger Federer erawhin Cincinnati Open-ah final a khel thung. Swiss star hian nomawi chawi lo mah se hma lam a pan zel a, point 600 hmuh belhin Nadal nen an inthlauhna chu point 3,740 a ni mek–ranking hmasa aiin an inkar a zim sawt.

Grand Slam vawi 20 champion tawh Federer hnungah hian tun hnaia khel ṭha thei tak Juan Martin del Potro a awm a; German player beiseiawm Alexander Zverev erawh season tir lamah pathumna ni mah se tun hnaiah a tlahniam a, palinaah a awm a ṭul rih.

Cincinnati Open champion Novak Djokovic chuan player pali ngawt kal kanin hma a sawn hle, Serbian tlangval hian point 4,445 hmuin parukna a ni leh tawh. World number 1 hlui hi season hmasa chawhnu lam leh, tun season chawhma lamah hliam vangin a buai a, a hliam dam hnuah erawh a kel ṭha leh tawh hle.

Kum 31 mi Djokovic hian August 19 khan Federer hnehin Cincinnati-ah nomawi a chawi a, mipa tennis player zingah ATP Masters 1000 khelh tur pakua awm zinga champion kim thei hmasa ber a ni; August 27 aṭanga khelh ṭan tur US Open-ah pawh inrintawkna sang tak nen a inlan thei ang.

ATP Ranking Thar
# Player Ram Points
1 Rafael Nadal Spain 10,040
2 Roger Federer Switzerland 7,080
3 Juan Martin del Potro Argentina 5,500
4 Alexander Zverev Germany 4,845
5 Kevin Anderson South Africa 4,615
6 Novak Djokovic Serbia 4,445
7 Marin Cilic Croatia 4,445
8 Grigor Dimitrov Bulgaria 3,790
9 Dominic Thiem Austria 3,485
10 David Goffin Belgium 3,435