United-in Mourinho an thlawp, mahse...
Manchester United-in Brighton & Hove Albion an hneh loh laiin an ṭhenawm club Manchester City chuan Huddersfield Town 6-1 zetin an sawp a, an hmelma Liverpool-in Selhurst Park-ah Crystal Palace 2-0 in an hneh bawk.
United ṭantute an mangang a, club chhungah fel lo a awm. Mawhphurtu lian bera ngaih Jose Mourinho chungah an ṭuan a, Portuguese manager hi bang turin an duh.
Kum hnih leh a chanve chhung leka Champions League-a Real Madrid vawi thum champion puitu Zinedine Zidane a hming a ri ring. Amaherawhchu, club thuneitu lamin, "Hnaruak awm miah loh chungin eng vangin Zidane-a chungchang kan sawi ang," tiin French manager an melh loh thu a sawi.
Lawm lo ve ve
Nipui transfer lai khan United chu defender pathum Harry Maguire (Leicester City), Toby Alderweireld (Tottenham Hotspur) leh Jerome Boateng (Bayern Munich) te nen sawi zawm an ni a, transfer tawp niah Diego Godin (Atletico Madrid) hming a rawn ri leh bawk.
Mourinho chuan, "Club thuneitute hnenah hming panga ka pe a, pakhat tal la thei ila ka duh khawp mai. Kan la thei ta lo a nih chuan kan player neihte chunga rinna nghat chungin thawhrimna nen theihtawp kan chhuah a ṭul ang," tiin a sawi lawk.
Season ṭan hmaa Real Madrid an hneh
ṭumin tunnel-ah Portuguese manager leh club chief executive Ed Woodward te second 23 chhung an inbe lai chu media lamin an hmu fuh a, Mourinho-a'n hlim hmel a pu lo.
Transfer hun a tawp a, Mourinho-a'n central defender duh belh mah se leisak a ni lo. United-in World Cup ṭan hmaa Brazilian midfielder Fred leh squad tihchhahna tura full back Diogo Dalot leh keeper Lee Grant an lak bak an neih belh tawh lo.
Club thuneitute chungah Mourinho a lawm lo a, amaherawhchu Portuguese manager hi season hmasa lamah hming langsar Romelu Lukaku, Nemanja Matic, Alexis Sanchez, Victor Lindelof, Zlatan Ibrahimovic, Eric Bailly, Henrikh Mkhitaryan leh Paul Pogba te an laksak tawh avangin sum sen tam an tum zui lo niin a lang ve bawk.
Season thumna
Jose Mourinho career thlirletin Portuguese manager hian hlawhtling taka FC Porto a chhuahsan hnuah intihthiam lohna a awm tlangpui. Chelsea-a enkawl hmasak ṭumin season thumnaah club neitu Roman Abramovich nen boruak an nei ṭan a, season lina turah a chhuak.
Inter Milan-ah erawh Jose Mourinho-a'n season thum a hmang tling hman lo a, Serie A nomawi pahnih leh Champions League nomawi a chawi hnuin Real Madrid-in Italian club hnenah zângnadawmna sang ber nen an la chhuak.
Real Madrid-ah Mourinho-a'n La Liga leh Copa del Rey nomawi vawi khat ve ve a chawi pui a, amaherawhchu season thum bak a daih lo. Portuguese manager hian referee bakah journalist leh club thuneitu a mil lo a, a tawpah chuan Chelsea-ah bawk let.
London club chu season hmasa berah Premier League-ah pathumna nih pui lehnghalin season hnihnaah a champion pui a, amaherawhchu season thumnaah engmah a kaltluang lo. Blues doctor Eva Carneiro chu uchuak takin a sawisel a, December 17-ah Premier League match 16-ah vawi 9 an chak lo. Club ṭantute lamin Mourinho hi la ngaina reng mah se club thuneituten loh theih loin an ban.
Manchester United-in Sir Alex Ferguson-a awm loh hnuah league nomawi an chawi thei lo a, David Moyes leh Louis van Gaal ten eng ruai an nih pui loh hnuah beiseina sang tak nen Jose Mourinho an lalut. Season hnih chhungin Europa League leh League Cup te a chawi pui a, amaherawhchu tunah season thumna a thleng leh ta, eng nge thleng zel dawn tih chu hunin a hril ang.