Atletico Madrid an chelh nghal!
UEFA Super Cup nomawi an chawi hnu lawkah Atletico Madrid-in beiseina sang tak nen La Liga season bul ṭan mah se beisei an phak lo a, an league match hmasa berah Valencia chu goal khat ve ve khungin an inhnehtawkpui!
Atletico Madrid tan forward Angel Correa chuan minute 26-na lekah goal hmahruai a khung a, Barcelona nena sawizawm Rodrigo chuan minute 56-naah an si phurh hi sutin Atletico-in goal dang an khung thei tawh lo.
Beiseina thamral
Atletico-in player nei ṭha ṭhin mah se tun hma chuan club 'lian zawk' nia lang lakah an player neih ṭhatte an chan ṭhin. Fernando Torres, Sergio Aguero, Diego Forlan, Arda Turan leh Digeo Costa te hoin Madrid khaw club-ah hun duhawm tak an hman hnuin an pem san vek.
Diego Costa erawh a kir leh tawh a, Europe club lianten lakluh tuma an hel Jan Oblak, Diego Godin leh Antoine Griezmann te pawhin Atletico chhuahsan aiin Diego Simeone hoa ropuina chan theih an inbeisei a, engkim a danglam tawh.
Mahse maw...
Player ṭha rualin Atletico-a cham an thlang a, an squad neih dan en pawhin Griezmann leh a ṭhiante hi Europe meuha rorel tur pawhin an ṭha tawkah ngaih a ni - beisei ang erawh a ni vek lo.
Tlarhmaah Griezmann leh Costa an chhawr kawp thei chungin goal khung an harsat a, Griezmann lakchhuah hnua Gelson Martins an la luhtir thei chung pawhin minute 26-naa goal an khung bak a chhunzawmna tur an nei thei lo.
Vanneihna zawk...
Atletico-in sawi vul an hlawh a, a nihna dik takah chuan Valencia lakah hian team 'vannei' zawka inchhal thei an ni. Minute 90 chhunga 49% ball changin an chang tlem zawk a, Valencia-in shot vawi 13 an neih laiin vawi kua chiah shot an nei thei!
Hei mai hi a ni lo, minute 90-naah Valencia hian chak theihna remchang an nei a, Dutch attacking midfielder Daniel Wass-a'n Oblak chauh a hmachhawn tawh tihah Slovenian keeper hi a paltlang thei lo.
Batman!
Chelsea boss thar Maurizio Sarri-a'n mamawh lo nia a inhriat avanga loan-a a chhuahtir striker Michy Batshuayi chu a club thar tan a inlan nghal a, minute 90-naa Daniel Wass hun ṭha neih khaṭha zeta a siamsak a ni.
Kum 24 mi striker hian season hmasa tawp lam pawh kha Borussia Dortmund-ah loan-in hun a lo hmang tawh a, German club-ah hian match 14 lekah goal kua a khung chungin Chelsea-ah a tan hmun a awm chuang lo.
Simeone a lawm
Atletico-in hnehna chang zo lo mah se Argentine coach Simeone chuan an khelh danah vuina tur a hmu lo. Kum 48 mi manager chuan, "Minute 120 ngawt inkhelh hnua inlan leh kan ni a, lungawi takin ka haw dawn a ni," a ti a, Super Cup an khelh avanga a naute an chauh thu a sawi.
Simeone chuan Valencia fak nghalin, "Season hmasa pawh khan Valencia kan pan dawn khan a harsat tur thu ka sawi tawh a, kuminah pawh chu chu a la danglam lo a ni," a ti a, point an hmuh theih avangin a lawm.
Inkhel Result
Valencia 1 - 1 Atlético Madrid
Athletic Bilbao 2 - 1 Leganés
# Team Pld W D L GF GA GD Pts
1 Sevilla 1 1 0 0 4 1 3 3
2 Barcelona 1 1 0 0 3 0 3 3
3 Levante 1 1 0 0 3 0 3 3
4 Real Madrid 1 1 0 0 2 0 2 3
5 Athletic Club 1 1 0 0 2 1 1 3
6 Huesca 1 1 0 0 2 1 1 3
7 Real Sociedad 1 1 0 0 2 1 1 3
8 Atlético Madrid 1 0 1 0 1 1 0 1
9 Celta de Vigo 1 0 1 0 1 1 0 1
10 Espanyol 1 0 1 0 1 1 0 1
11 Valencia 1 0 1 0 1 1 0 1
12 Girona 1 0 1 0 0 0 0 1
13 Real Valladolid 1 0 1 0 0 0 0 1
14 Eibar 1 0 0 1 1 2 -1 0
15 Leganés 1 0 0 1 1 2 -1 0
16 Villarreal 1 0 0 1 1 2 -1 0
17 Getafe 1 0 0 1 0 2 -2 0
18 Rayo Vallecano 1 0 0 1 1 4 -3 0
19 Deportivo Alavés 1 0 0 1 0 3 -3 0
20 Real Betis 1 0 0 1 0 3 -3 0