India-in goal surtir

Asian Games mipa hockey champion lai India chuan nomawi humhim an tum tih an lantir nghal. Thawhṭanni zan khan an match hmasa ber khelin a thlengtu Indonesia chu 17-0 ngawtin an sawp a, vawiin chun dar 12:30 hian China nen an inkhel leh ang.

India tan hian player pathum Dilpreet Singh (6', 29', 32'), Simranjeet Singh (13', 38', 53') leh Mandeep Singh (29', 44', 49') ten hattrick an siam vek bakah, Rupinder Pal Singh (1', 2'), Akashdeep Singh (10', 44'), S V Sunil (25'), Vivek Sagar (26'), Harmanpreet Singh (31') leh Amit Rohidas (54') ten an khung bawk.

Inelna an ṭan hma aṭangin world number 5 India hi chak tura rinkai an ni sa a, khelmual chhungah pawh a tir aṭanga a tawp thlengin a khat tawkin an vaw lut reng. Penalty corner vawi 11 an hmuh zinga paruk an chhawr ṭangkai a, goal khat hi penalty aṭanga an khung niin, a dang zawng chu team thawhrah aṭanga lut a ni.