Halep chawl rih dawn

World number 1 Simona Halep chu US Open inbuatsaihna tournament hnuhnung ber tur Connecticut Open-ah inlan tura ngaih ni mah se a inhnukdawk. Romanian nula hian tun hnaiah match a khelh hnem bakah a ke artuiah hliam tenau a tuar.

Kum 26 mi Halep hian tennis a khelh hun chhunga a Grand Slam nomawi hmasa ber atan French Open nomawi a chawi a, a hnuah Rogers Cup a lak leh tawh bakah kar hmasa mai khan Cincinnati Masters final a khel bawk.

A chawlh tur thu sawiin Halep chuan, "Kar hnih chhungin match ka khel hnem a, ka taksa a chau tawh. Tunah chuan chawlh ka mamawh rih a ni," tiin tun kar chhungin a taksa a hahchawlh tir tur thu a sawi.

Season kal laia Grand Slam hnuhnung ber US Open chu August 27 aṭang hian khelh a ni dawn, world number 2 Halep hi champion tura rinkai a ni phak ang. Flushing Meadows, New York-ah 2015 khan Halep hian semifinal a thleng a, hei hi a thlen san ber ṭum a ni.