Messi awmna Argentina chak zo lo
Argentina chuan hun chanve hma lamah penalty hmangin si phur mah se an sut thei a, chakna goal Lionel Messi-a'n a khung erawh VAR hman a nih hnuah pawm a ni lo.
Nimin zing khan Buenos Aires-ah 2022 World Cup qualifiers khelh niin, mualneitu Argentina leh Paraguay 1-1 in an inhnehtawk. Messi awmna Argentina hian match thum khelhah point sarih an hmu a, ram 10 inel zingah a chung berah an awm.
Defender Lucas MartÃnez Quarta-a'n Miguel Almiron a tih tluk vanga a penalty chawi chu Angel Romero-a'n minute 21-ah a khung, tun hnai a match hnuhnung pathumah Paraguay winger hian goal thum a khung.
Chawlhlawk hmain Giovani Lo Celso-a corner pet chu Nicolas Gonzalez chuang chiang zeta tauh lutin si phurh a sut a, 1-1 in half time an hmang. Second half-ah Argentina lamin ball chang tam mah se an vannei thei lo a ni.
Barcelona captain Messi-a'n chakna goal tur a khung, mahse a goal hma hian ball an chan theih nan Paraguay player an ti tlu. Referee Raphael Claus-a'n hamrik ham lo mah se VAR hman a ni a, goal atan an pawmsak ta lo.
Hun tawp dawnah Paraguay lamin penalty vawi hnihna hmuh ngei an beisei, amaherawhchu Nicolas Otamendi chuan a kutin ball a khawih fuh chungin hrem a ni lo, ram pahnih hi point khatah an lungawi a ngai.
Argentina hian an match lehpek atan chuan Nilaini zing dar 6:00-ah Peru an lenchilh dawn. Paraguay pawhin Bolivia an mikhual ve thung a, match thum an khelh tawh chinah Bolivia hian point an la hmu ve lo.