Lo neitu fapa Chaudhary kutah Gold Medal

"I retheihna chu i nih tum nih loh chhan atan a lian tawk lo" tih thu ti diktu chu Saurabh Chaudhary a ni. Lo neitu fapa Chaudhary hian nimin khan Asian Games 2018 neih meka 10m air pistol huangah gold medal a kap chhuak a, kum 16 mi chanchin hian India ram a deng chhuak rang hle.

Chaudhary hi senior inelna huangah a vawi khat inlanna a ni a, pakhatna ni tur hian point 240.7 a hmu a, amah hnaih bertu Japanese shooter world champion pawh ni tawh Tomoyuki Matsuda chuan 239.7 a hmu thung - an inhlat lo hle. India tlangval pakhat zawk Abhishek Verma chuan bronze medal a hlawh chhuak ve thung a ni.

Junior World Cup-ah chuan Chaudhary hian pakhatna dinhmun a lo luah tawh a, tun ṭumah hian Jitu Rai aia thlan niin, a kum la naupang hle mah se a theihna sang leh mibik a nihna chu thup theih a ni lo - Indian shooter zingah Asian Games-a gold medal la thei pangana a ni ta hial.

Chaudhary chuan, "Tawnhriat nei ṭha tam tak nen kan inel a ni a, a awlsam lo hle. Mahse, inelna bak thil dang ka ngaihtuah duh lo a, a tawpah a vannei berah ka ṭang," tiin hnehna a chan dan a sawi a, pakhatna ni mah se a elpui lakah a indah sang bik lo hle.

Nimin khan kum 27 mi Rahi Sarnobat-i chuan 25m Pistol huangah gold medal a kap chuak ve bawk a, silai inkahsiakah record thar a siam. Indian hmeichhe shooter zingah, Maharastra nula hi mimal inelna huanga Asian Games-a gold medal la thei hmasa ber a ni.

India hian nimin tlai thleng kha chuan gold panga la tawhin, medal a lak tawh belhkhawm chu 12 a ni - ram hrang hrang 45 inel zingah parukna an ni mek. Inelna hi chhun leh zan zawma neih reng a nih avangin an dinhmun hi a danglam ve reng thei bawk.

Lawmna mittui
Meerut district chhunga thingtlang khaw pakhat Kalina aṭanga rawn chawr chhuak Chaudhary hi fu (sugarcane) chingtu Jagmohan Singh fapa a ni a, a nu Brijesh Devi erawhin inlan a enkawl thung - tunah hian class X zirlai chauh a la ni.

Brijesh Devi chuan a fapa chungchang sawiin, "A pa hi chuan silai kah a thiamzia hi a sawi uar ṭhin hle a, mahse midang hriat a hlawh ngai lem lo. Tunah chuan khawvel hmuhah a thiamna chu pholanin a awm ta, India tan chanchin lawmawm a thlen avangin kan khua a mipui zawng zawng chu hlimin kan lam a ni," a ti.

Saurabh hi unau pathum zinga a naupang ber a ni a, a u pakhat zawk Nitin Chaudhary chuan, "Kan naupan laia silai lem kan neih aṭang tawhin a tui tawh a, a hnuah kan khua velah hian air gun hmangin thil a kap leh bawk. Chutih rualin engtik niah emaw chuan India tan medal a kap chhuak ang tih erawh kan suangtauh phak ngai lo," tiin a unaupa zinkawng a sawi.

Hockey-ah Goal Sur
Asian Games 2018 khelh mekah India tlangval leh nula hockey khel thiam ten goal an sur tir zel. Thawhlehni zan khan Mizo nula Lalremsiami hattrick siamna inkhelah India chuan Kazakhstan 21-0 in an sawp a, Inrinni zanah South Korea nen an inkhel leh ang. Nimin khan mipa team pawhin an match hnihna an khel a, hockey huang chhunga an chak chian ber ṭum tawng turin Hong Kong chu 26-0 in an sawp - match thumna atana Inrinni zan hian Japan nen an inkhel leh dawn. Kolasib nula Siami chuan, "Kan duh leh ruahmanna ang takin kan khel thei a, nuam ti taka kan khelh avangin result kan nei ṭha," tiin Vanglaini a hrilh a, an inkhelh leh zelna turah Mizo mipuite ṭawngṭai puina a ngen bawk.

India Hmeichhe Results & Fixtures
August 19, Pathianni
India 8 - 0 Indonesia
August 21, Thawhlehni
India 21 - 0 Kazakhstan
August 25, Inrinni
India 6:30 PM South Korea
August 27, Thawhṭanni
India 12:30 PM Thailand
India Mipa Results & Fixtures
August 20, Thawhṭanni
India 17 - 0 Indonesia
August 22, Nilaini
India 26 - 0 Hong Kong
August 24, Inrinni
India 6:30 PM Japan
August 26, Inrinni
India 4:30 PM South Korea
August 28, Thawhlehni
India 2:30 PM Sri Lanka