Wenger an chawimawi dawn

Liberian president George Weah chuan football a khelh hun laia amah siam liantu Arsene Wenger a theihnghilh lo, French manager hnenah hian an ram chawimawina sang ber Order of Distinction a hlan dawn. Chawimawina hi Liberia khawpui Monrovia-ah Zirtawpni hian hlan a nih tur thu information minister Eugene Nagbe chuan a puang.

Wenger hian AS Monaco a enkawl laiin Weah hi a lalut a, African player zingah World Player of the Year chawimawina dawng thei awmchhun a nih theih nana a rahbi pawimawh a ni. Arsenal manager hlui hian ani bakah hian African player tam tak a siam lian bawk.

Gunners manager chawimawi a nih tur hi sawiseltu an awm nual, mi ṭhenkhat ngaihdanah chuan President hian a mimal nuna mi pawimawh hnenah hetiang thil hi a hlan ngawt tur a ni lo, tih thawm a ri ring hle.

Mahse, information minister Eugene Nagbe chuan, "Kan president chauh hi a ni lo a, African player tam tak a cher chhuakin a siam lian, kan rama infiamnain hma a sawn theih nan tha a thawh hlawk hle a ni," tiin Wenger an chawimawi tur chhan a sawi.

Arsenal manager hna kum 22 chhung a thawh hnua Emirates Stadium chhuahsantu Wenger hian African player 16 ngawt a enkawl tawh a, an zingah hian Kolo Toure, Lauren leh Nwankwo Kanu te chu a langsar leh hlawhtling zual an ni.

President Weah chuan, "Wenger hi awm lo se la chuan Europe-ah ka inkhel ve thei lo ang, a fapa ang maiin min enkawl a, Monaco tana khel tura min lakluh ni kha nimin ang maiin ka la hrechiang a ni," tiin a sawi.