UEFA-in Beckham an chawimawi dawn

England captain hlui David Beckham chu UEFA-in football tana a hnathawh leh khawvel hmun hrang hranga he infiamna tihlar kawnga a thawh hlawk em avangin UEFA President's Award a hlan dawn.

Football-a mi bik leh entawn tlak bik tana hlan ṭhin chawimawina hi kum 1998 khan ṭan a ni a, kum thum 1999, 2015 leh 2016 khan an awl tih loh chu kum tinin sem a ni.

UEFA president Aleksander Ceferin chuan, "Anmahni hunah chuan Beckham hi football khawvela entawn tlak dik tak a ni, " tiin a fak.

He chawimawina dawng tur hian khelmual chhunga thiam chauh a tawk lo a, khelmual pawn lama entawn tlak an nihna te chu a pawimawh tel. Chawmawina dawng tawh zingah Johan Cruyff, Bobby Charlton, Franz Beckenbauer, Bobby Robson leh Paolo Maldini te an tel a ni.

England captain hlui Beckham hian a football career kum 20 chhungin club leh ram tan vawi 762 a inlan a, goal 130 a khung. Club inelnaah nomawi 19 zet a chawi a, chung zingah chuan league nomawi 10 a tel. English midfielder hi club-ah chuan United bakah LA Galaxy, Real Madrid, AC Milan leh Paris St-Germain tan a khel tawh ṭhin.

Kum 43 mi Beckham chuan, "Ka inkhelh hun chhung khan team hlutna leh fairplay tilang turin 100% ka pe ṭhin. Player langsar tak tak zinga min tel ve a, award ka dawng ve tur hi lka lawm hle a ni," tiin a sawi.

A inkhelh hun lai sawi chhunzawmin, "Ka inkhelh hun chhinchhiahtlak ka tawng ṭheuh a, chung zingah chuan Champions League nomawi chawi tura Barcelona-a Bayern Munich kan hneh zan te kha theihngilh theih a ni lo," tiin Manchester United treble champion ṭum a sawi lang.

Beckham hi UNICEF ambassador a nih bakah Miami-ah Major League Soccer club a nei bawk. England captain hlui chuan, "Football-a ka hlawhtlinna vangin UNICEF nen ṭangkawpin khawvel hmun hrang hranga naupangte ka pui thei a, midang tana ka ṭangkai ve thei hi ka lawm. Miin an ring che chuan inrintawkna pawh kan ngah phah. Naupang, a bik takin hmeichhe te kan puih hian an theihna an lantir ngam phah a ni," tiin chan hai zawkte puih nuam a tih a sawi.

Beckham hian Spice Girls star Victoria Adams chu July 4, 1999 khan nupuiah a nei a, fa pali - mipa pathum Brooklyn Joseph, Romeo James leh Cruz David bakah fanu Harper Seven te a nei tawh a ni.

Year Chawmawina dawngtu Ram
1998 Jacques Delors France
1999 –
2000 Guy Roux France
2001 Juan Santisteban Spain
2002 Bobby Robson England
2003 Paolo Maldini Italy
2004 Ernie Walker Scotland
2005 Frank Rijkaard Netherlands
2006 Wilfried Straub Germany
2007 Alfredo Di Stéfano Spain
2008 Bobby Charlton England
2009 Eusébio Portugal
2010 Raymond Kopa France
2011 Gianni Rivera Italy
2012 Franz Beckenbauer Germany
2013 Johan Cruyff Netherlands
2014 Josef Masopust Czech Republic
2015 –
2016 –
2017 Francesco Totti Italy
2018 David Beckham England