Hausa zual 10 zingah Sindhu

Hmeichhe infiammi sum lalut hnem zual hming tarlan a ni a, India nula badminton khel thiam PV Sindhu chu pasarihna a ni. American magazine lian Forbes-in a tar chhuah tharah hian Serena Williams chuan pakhatna dinhmun a luah.

Infiammite sum lakluh hi June 2017 aṭanga June 2018 inkara mi chhut a ni a, Grand Slam vawi 23 champion tawh Serena hian kum liam ta chhung hian lawmman atan £48,050 chauh vaw chhuak mah se, court pawn lam aṭanga a lakluh nena belhkhawm chuan pound maktaduai 13.95 zet a lalut tling - a zawnin kum thum chhung chu pakhatna dinhmun hi a luah.

A hausa zual 10 zinga pariat ngawt chu tennis player an ni a, midang pahnih Sindhu (badminton) leh Danica Patrick (race car driving) te an tlazep ve hram. A zawna kum 11 chhung zet pakhatna hauh thei Maria Sharapova chu thla 15 zet hrem a nihna zo tawh mah se a dinhmun ngai a la luah leh thei lo a, Russian nula hi pangana a ni.

Kum 23 mi Sindhu hian June 2017 aṭanga June 2018 chhung khan £6.6m (Rs 59,54,23,042) a lalut hman a, Rio Olympic-ah gold la zo lo mah se silver a dawng a, India tan badminton huangah sulhnu ṭha hnutchhiahin, nomawi tam tak a vaw chhuak tawh a ni.

Mipa lamah chuan US boxer Floyd Mayweather-a'n pakhatna dinhmun a la luah, a hnungah hian footballer langsar Lionel Messi leh Cristiano Ronaldo te an awm bawk.

Hmeichhe infiammi sum lalut hnemte
# Player Infiamna Lakluh
1 Serena Williams Tennis £14m
2 Caroline Wozniacki Tennis £10.1m
3 Sloane Stephens Tennis £8.7m
4 Garbine Muguruza Tennis £8.5m
5 Maria Sharapova Tennis £8.1m
6 Venus Williams Tennis £7.9m
7 PV Sindhu Badminton £6.6m
8 Simona Halep Tennis £6m
9 Danica Patrick Race car driving £5.8m
10 Angelique Kerber Tennis £5.4m