PSV-in Champions League an hnaih

Champions League khel turin PSV Eindhoven chuan lei rem an rap zel–Thawhlehni zan khan Champions League playoff first leg-ah BATE Borisov chu 3-2 in an hneh.

Dutch club-in hnehna an channa hmun hi khualmual a nih avangin dinhmun ṭha zawk an ni a, August 29 zanah BATE hi an mikhual ve leh ang.

Champions League playoff inkhel dangah Benfica-in PAOK FC lakah hnehna an chang zo lo a, goal khat ve ve khungin an inhnehtawk. August 29 zanah vek an intawng leh dawn a, mahni muala khel Benfica tan a harsa sawtin a rinawm.

Inkhel hmuhnawm

BATE Borisov hi Belarusian champion niin Belarus hi mikhual tana inkhelh harsatna hmun a ni. Ṭantirh aṭangin mualneitu team-in goal khung an tum ngam a, Dutch club lakah zahngaihna lantir an tum lo.

Minute kuana lekah mualneitu team-in an beisei ang ngeiin goal an hlawh chhuak nghal a, Finnish striker, kum 22 mi lek Jasse Tuominen chuan Europe-ah pawh a zam lo tih pholangin goal hmahruai a khung.

Mahse, BATE hlim chhung erawh a rei lo. Minute 35-naah mikhual team-in penalty an hlawh chhuak a, Gaston Pereiro chuan goal-ah a chantir. Goal dang lut loin chawlhlawk hman a ni a, team pahnih dinhmun chu 1-1 a ni.

Hleb a la tar lo, mahse...

Second half-ah PSV an chungnun chhunzawm a, Dutch club tan hian Hirving Lozano chuan minute 61-naah hmahruaina goal a rawn khung. Borisov Arena-ah mipui thawm a reh a, mualneitu an hawihai.

BATE coach Alyaksey Baha-a'n chak an mamawh tih a hria a, an goal hnihna an chhuah aṭanga minute li hnuah Arsenal winger hlui Alexander Hleb a luhtir. Belarus legend hian kum 37 lai ni tawh mah se a thiam a la theihnghilh lo tih a pholang a, minute 88-naah an si phurh a sut.

Goal dang awm tawh loin team pahnih an inṭhen ngei dawn niin a lang a, mahse Borisov Arena-a mipui thawm ṭhat chhung a rei lo hle. Kum 2017-a Arsenal aṭanga PSV a pan hnua a senior goal hmasa ber ni turin Malen chuan goal-a khung a, 3-2 in PSV an chak.

Benfica chak zo lo

PAOK lakah Benfica chungnung zawkah ngaih an ni a, an beisei ang result erawh awlsam takin an hlawh chhuak lo. Midfielder Pizzi chuan first half-ah penalty hmangin goal hmahruai a khung a, mualneitu Benfica an lam.

Mahse, Portuguese club hian 64% zet ball changa shot vawi 14 ngawt an neichungin goal dang an hlawh chhuak thei lo a, second half-ah mikhual team zawkin goal an khung–substitute Amr Warda chuan minute 74-naah si phurh sutna goal a khung a, Benfica lamin a chhanletna an neih tawh loh avangin 1-1 in an ṭin.

Hetihlai hian Serbian club Red Star Belgrade-in anmahni mualah goal an khung thei bik lo a, Austrian club ṭha Red Bull Salzburg nen goal khung loin an inhnehtawk–August 29 zanah second leg khel turin an intawng leh ang.