India an chak ve ta

India chuan nimin khan England chu test vawi thumnaah run 203-in an hneh a, test match vawi hnih dang khelh tur la awmah 2-1 in la hnufual mah se whitewash an pumpelh a, chak theih dan kawng a la inhawng bawk.

Test match vawi lina hi August 30 - September 3, 2018 inkar hian Rose Bowl Cricket Ground-ah khelh a ni ang.

Danglamna Kohli

Trent Bridge-a inkhelah England chu ṭhumvawrah an chak a, vawm an thlang. India captain Virat Kohli-a'n hming chher nan a hmang a, run 97 zet vaw chhuakin Ajinkya Rahane chuan run 81 a siam a, Men in Blue an chet ṭhat rual avangin first innings-ah hian run 329 an tlin.

England bat hun a thleng a, Indian bowler Hardik Pandya chuan run 28 chiah pein wicket nga a la a, mualneitu hian run 161 chiah an siam. Second innings-ah Kohli bawk che ṭhain run 103 a siam a, India captain century siam bakah hian Chesteshwar Pujara (72 runs) leh Pandya (52) ten half century siam bawkin run 352 an siam.

India hian wicket sarih chiah la hloh mah se chak theih an beisei avangin an duhtawk a, target atan 521 an siam sak. England batsman ten Jasprit Bumrah an ngam lo. Gujarat fast bowler Bumrah hian run 85 pe mah se wicket nga zet a la.

England tan Jos Buttler chuan century a siam a, run 106 vaw chhuak mah se awmzia a awm pha lo. Ni nganaah India-in wicket khat bak lak an mamawh tawh lo a, over thum pawh tling loah Ravichandran Ashwin vawm chu Jimmy Anderson chuan vaw sualin Rahane-a'n awlsam takin a man sak.

Captain Kohli-a'n bul ṭanin mikhualna hmunah India an che ṭha a, run 203 in hnehna an chang.

Kerala tan

India captain Kohli chuan, "Kan mamawh tak hnehna kan chang ta. Inkhel kan thununna chhan chu batsman-in runs kan vaw chhuak a, wicket la turin bowler an tui hal bawk," tiin a sawi.

Kohli chuan an hnehna chan hi Kerala-a tuilian tuarte tan a hlan bawk.