Vettel ringtu Horner

Formula 1 nipui chawlh a zo tawh a, dri­ver ṭhenkhatin season thara an team an thlak tur thu an tichiang tawh. Season kal laiah champion tur a la chiang lo a, Red Bull team boss Christian Horner chuan a driver hriatchian Sebastian Vettel chu hmahruaitu Lewis Ha­milton tan ngaihthah theih a nih loh tur thu a sawi.

German driver Vettel-a'n Red Bull car a khalh laiin Formula 1 champion vawi li a ni tawh a, team ṭha zawk Ferrari a zawm hnuah erawh a la champion thei lo - a chunga awm Hamilton aiin point 24 in a hniam zawk mek a ni.

Horner chuan, "Bo­ruak sang hnuaiah chuan Vettel hi driver ṭha tak a ni, season chawhnu lamah hian hun ṭha a nei hlauh a nih chuan midang tana hneh harsa tak tur a ni," tiin an driver hlui chu Mercedes chhuanvawr Hamilton aiin a la duhsak zawk tih a hriat theih.

Season thar aṭang chuan F1-ah boruak thar a awm dawn, Daniel Ricciardo chuan Renault car a khalh tawh dawn, a hmun ruakah Pierre Gasly a awm thung ang. World champion vawi hnih ni tawh Fernando Alonso a chawl tawh dawn thung.