A lian pali kan awm dawn - Djokovic

Tun hnaia khel ṭha thar leh Novak Djokovic chuan a vawi thum nan US Open nomawi chawi a tum tur thu a sawi a, chutih­rualin tun hma lam aṭanga a elpui player ṭha dangte nen an inel tur thu a sawi.

Mipa tennis khawvel­ah chuan Roger Federer, Ra­fael Nadal, Andy Mur­ray leh Djokovic te hi 'Big Four' tia sawi ṭhin an ni, hliam leh harsatna dang vangin tun hnaiah anni pali hi an inhmachhawn tam tawk lo - Serbian tlangval chuan player ṭha pali te hi New York-ah chuan tun hma anga an inel leh a rin thu a sawi chhuak.

ATP 1,000 Masters title pakua la kim thei hma­sa ber Djokovic chuan, "Hun rei tak harsat­na vanga ka indawm kun hnuah Wimbledon leh Cincinnati nomawi ka chawi ve leh thei a, hliam nei loa inkhelh hi chu a nuamin beiseina thar min siamsak leh ṭhin," tiin a sawi.

Federer leh Nadal ten Grand Slam an chawi hnem fal a, chutihrualin kum 31 mi Djokovic hian a elpui dangte nen an intawn tawhna bikah chuan record an nei ṭha hle - Nadal (27-25), Federer (24-22) leh Andy Murray (25-11) te chu a hneh hnem zawk vek.

Grand Slam vawi 13 champion tawh Djokovic chuan, "Ka elpui te hi an la chuai lo a, an sulhnu en hian tun inelna lian kan khelh leh turah pawh nomawi chawi tura rinkai vek an ni. Anni nen hian kan inel leh dawn, chutihrualin player naupang zawk rawn chhuak thar ṭha tak tak pawh an awm," tiin a sawi.