Nations League: Portugal nge France-in semifinal khel dawn?

Nations League-ah match hnih chauh khelh a ni tawh dawn a, a hmawr an bawk fel tawh dawn avangin inkhel a pawimawh tawh hle. League A group 3-ah Portugal leh France te an che ṭha fal a, amaherawhchu semifinal-ah hmunruak pakhat chauh a awm avangin zanin dar 1:15-a an inkhel tur hi a pawimawh hle.

Team pahnihin point 10 ve ve an hmu tawh a, Portugal-in Croatia an la hmachhawn dawn a, France leh Sweden an la inkhel dawn. Chutihrualin zanin inkhel hian thui tak a hril ang.

UEFA hnuai inelnaah head to head a pawimawh a, hetah hian away goal rule chhiar tel a ni. Stade de France-a an inkhelh ṭumin goal awm loin an inhnehtawk a, Les Bleus tan dinhmun ṭha zawka ding turin an chak zawk lo an ni thei lo a nih pawhin goal awma an inhnehtawk a pawimawh ang. 

Portugal-in Cristiano Ronaldo an kawl a, Juventus forward ho hian Euro C'ship bakah Nations League-ah an champion tawh. Kum 35 mi Ronaldo hian ram tan goal 102 a khung  tawh a, international match-a goal khung tam ber ni turin goal riat chiah a mamawh tawh avangin Portugal inkhel apiangin ngaihven a hlawh tawh dawn.

Ronaldo telna Portugal hi mimal pakhata innghat an ni tawh lo. Kil tinah player langsar an kawl tawh a; keeper Rui Patricio, defender Ruben Dias, midfielder Bruno Fernandes leh Bernardo Silva bakah forward Joao Felix te hi ram tinin neih an châk turte an ni.

Euro 2016 final-ah France vanduai mah se World Cup-ah an ṭhatzia lantirin an champion. Les Bleus hian player ṭha rual an kawl a, hmabak nei êng player an kawl tel bawk. 

Amaherawhchu Didier Des-champs-a hote hian an match hnuhnung berah Finland an hneh lo a, Manchester United buaina Paul Pogba tho chu an buaina tur a ni thei ang.

Harsatna belhchhah turin player pawimawh dang Benjamin Pavard leh Kylian Mbappe te dinhmun a la hriat lo a, Portugal tlarhnungin PSG forward Mbappe hi dam hman lo se an duh zawk ang.