Carabao Cup ; Chelsea-in Spurs hnehin final an lut

Chelsea-in Carabao Cup final lut turin harsatna an tawk lo. Thomas Tuchel-a hote hian Nilaini zan khan Stamford Bridge-a 2-0 a an hneh tawh Tottenham Hotspur chu khualmualah 1-0 in an hneh leh a, aggregate-ah 3-0 in an chak.

Blues hian final-ah Liverpool leh Arsenal inkhela chak zawk an hmachhawn dawn a, nomawi inchuhna hi February 27, Pathianni zan khian Wembley Stadium-ah khelh a ni ang.

Chak tur a chiang
Tottenham Hotspur Stadium-ah Chelsea-in bul an ṭan ṭha a, Romelu Lukaku hmangin Spurs keeper Pierluigi Gollini tan hna an siam nghal. Defender Antonio Rudiger-a ball vawrh luh chu Romelu Lukaku-a'n a lenna leh chakna hmangin box chhungah a la thla a, goal-ah kawh takin pet mah se keeper zawnah a kal.

Chelsea-in chance ṭha hmasa hlah mah se minute 18-naah goal an khung tho a, Mason Mount-a corner pet chu Malang Sarr-a'n tauh ṭhelh mah se Rudiger-a hnung perin goal-ah a lut.

Blues hian first leg-ah 2-0 in hnehna an chang a, second leg-ah goal an khung hmasak leh bawk avangin 3-0 in hma an hruai. Tottenham tan thawhchhuah theih la ni mah se hna a harsa tawh.

Beisei nei Spurs
Tottenham an beidawng duh lo a, Pierre-Emile Hojbjerg ball pet chu box pawnah chiah a kal. Danish midfielder Hojbjerg hian minute 39-naah Harry Kane-a through ball chu um lutin Rudiger-a'n a tlawh thlu.

Hojbjerg hi box chhungah a tluk avangin referee Andre Marriner-a'n penalty a pe nghal. VAR hmanga enlet hnuah erawh Rudiger hian box pawna a tihtluk avangin referee-in penalty sutin freekick a pe ta zawk.

Second half-ah pawh Spurs-in nung takin bul an ṭan a, minute 56-naah Kane ball pek luh chu Lucas Moura-a'n um lutin keeper Kepa Arrizabalaga hmaah a tlu. Referee-in penalty kawk nghal mah se VAR hmanga enlet hnuah keeper a khawih hmaa a tluk tawh avangin penalty hi an sut.

Spanish keeper Kepa hian Edouard Mendy awm loh vanga a hun ṭha neih a hmang ṭangkai a, Emerson Royal-a ball tauh luh tur a save ṭha hle. Antonio Conte naute pressure an pe ṭha a, Chelsea box pawn chiahah ball chhuh letin Moura-a'n Kane a pe a, England captain hian defender Rudiger chiah hmachhawnin net puar pawpin a pet lut.

VAR hmanga enlet a nih hnuah Rudiger hi goal hnaih bera ding (last man) a ni a, chumi zawh chu Kane a nih avangin offside vangin goal hi pawm a ni lo. Kane a thawhchhuah Ryan Sessegon-a'n goal-ah a pet a, keeper Kepa-a'n ṭha zetin a dang leh bawk.

Tuchel a hlawhtling
Chelsea-in Thomas Tuchel-a enkawlna hnuaiah final ṭum thum an thleng der tawh. German manager hian nikum January thla khan Frank Lampard a thlak a, kum khat vel awrha a hlawhtlinna hi a ropui hle.

Tuchel-a hnuaiah Chelsea-in Champions League, FA Cup leh League Cup final an lut vek a, heng zinga a hlu ber UCL nomawi an chawi. Tun season-a League Cup final thleng tur hian an squad ṭhatzia a lang leh bawk.

Keeper ṭha mi Mendy awm loh lang loin Spanish keeper Kepa a che ṭha a, second half-ah player ṭha ṭhiau Thiago Silva, Marcos Alonso, Hakim Ziyech, Ruben Loftus-Cheek leh N'Golo Kante te an la luhtir thei a, squad a chhah hle.

Tuchel a lawm
Chelsea manager Thomas Tuchel chuan, "Semifinal kan thlen tawh chuan tute pawhin final thlen ngei an duh. Kan hmaa Wembley Stadium-a inkhel tur a awm hi kan lawm a, coach leh player te duhthusam a ni," tiin final an thlen avanga an lawm thu a sawi.

Inkhel chungchang sawiin Tuchel chuan, "Bul kan ṭan ṭha a, kan inringtawk. Goal kan khung hnuah pawh kan khel ṭha a, mahse darkar chanve hnu lamah khan kan inthlahdah ta deuh a ni. Second half-ah pawh thawnthu ngai a thleng a, bul kan ṭan ṭhat hnuah ball kan hloh hnem avangin kan talbuai. Chutihrualin inkhel pahnih thlirin chak phu zawk kan ni," a ti.

Blues hian season ruk chhung a zawna Wembley Stadium-a final an khelhna tur a ni a, final vawi nga an khelah erawh ṭum khat chiah an chak. 2017–18 season khan FA Cup final-ah Manchester United 1-0 in an hneh a ni.

Conte hnuaiah hmasawnna a awm em?
Tottenham Hotspur-in November 1 khan manager Nuno Espírito Santo an ban a, Antonio Conte hi November 2 khan an lalut. Italian manager awm hnuah hmasawnna a awm ngei a, amaherawhchu Spurs hian nomawi an chawi dawn a nih erawh chuan hmasawnna tur a la tam hle.

Nuno hnuaiah hian league match 10 khel hmanin vawi nga chak hman mah se vawi nga tho an chak lo. Conte hnuaiah hian league match riat an khel tawh a, vawi nga hnehna chang tawhin vawi thum an inhnehtawk a, chak loh an nei lo.

League-ah pawh paruknaah awm mek mah se an chung chiaha awm an hmelma Arsenal chu point hnih chiahin an pha lo a, match hniha an khelh tlem zawk avangin season tawpah Gunners chunga an awm theih a beiseiawm leh ta hle. Tunkar tawp hian North London derby hi khelh a ni dawn a, Pathianni zana Tottenham Hotspur-a an inkhel tur hi a boruak a 'hot' khawp ang.

Spurs hian Conte hnuaiah hmasawn hret mah se Italian manager hi Juventus, Chelsea leh Inter Milan te champion pui tawhtu a nih avangin hmasawn a la ṭul. League Cup semifinal aṭanga thlirin Spurs hi Chelsea nena an inkar a zau a, Conte-a'n nomawi chawi a duh a nih chuan club lian zawk nena an inkar a tih zim hret hret a ṭul ang.

Chutihrualin tun season-ah chuan Conte tan nomawi hi a pawimawh ber a ni lo a, season thara Champions League khelh phak chu hlawhtlinnaah a ngaih theih ang. Chumi tur chuan Spurs hian squad tih chhah hret an mamawh a, Wolves forward Adama Traore chu January transfer-a lakluh tumin hma an la mek.

EFL Cup - Thlirna Tawi
Semifinal
Chelsea 3 - 0 (agg) Tottenham
1st leg : January 5, Nilaini zan
Chelsea 2 - 0 Tottenham
CHE : Kai Havertz 5'; Ben Davies 34' (OG)
2nd leg : January 12, Nilaini zan
Tottenham 0 - 1 Chelsea
CHE : Antonio Rudiger 18'
Liverpool vs Arsenal
1st leg : Nizan inkhel result kan hre hman lo
2nd leg : January 20, Ningani zan
Final : February 27, 2022

Rudiger-a'n contract a pawtsei ang - Tuchel
League Cup semifinal second leg-a goal awmchhun khungtu Antonio Rudiger-a contract neihlai hi tun season tawp rualin a tawp dawn. Germany international hian ama duhthuin club dang a dawr thei tawh.
Chelsea manager Thomas Tuchel chuan, "Kan tum a chiang a, kan inbe mek a, kan hlawhtlin ngei kan ring.

"A duhzawng chhawpsak tur kan nei a, Chelsea player a la ni mek a, Chelsea boruak hrechiangtu a ni," tiin contract a ziahpui theih ngei a beisei thu a sawi. Kum 28 mi Rudiger hian July 2017 khan Roma aṭangin Chelsea hi a zawm a; Blues hi FA Cup, Europa League leh European Super Cup-ah te a champion pui tawh a ni.