Djokovic leh Nadal-te intawng har dawn

Tennis season khat chhunga Grand Slam hmasa ber Australian Open 2022 khelh dan tur an siam chu tar chhuah a ni a, champion lai Novak Djokovic leh a elpui Rafael Nadal te chu an kaltluang a nih chuan semifinal-ah an intawng thei dawn.

Djokovic-a'n a match hmasa berah amah ang bawka Serbian player Miomir Kecmanovic a hmachhawn dawn. Grand Slam vawi 20 champion tawh Nadal chuan bul ṭan nan American player Marcos Giron a hmachhawn thung ang.

A chiang lo
Australia ramah Djokovic-a awm tawh a, nimin khan Melbourne Park-ah training pawh a nei. Mahse, prime minister Scott Morrison-a'n hri leng chungchanga an ram inkaihhruaina a sawiah, ram pawn lam aṭanga zin mite an buaipui dan an la ti danglam lo tih a sawi.

Immigration minister Alex Hawke-a'n a thuneihna a hmang a nih chuan Djokovic hi thawn haw leh nghal theih a la ni. A dinhmun la chiang vek thei lo mah se Tennis Australia chuan tournament khelh dan tur hi an duan a ngai tawh.

Kum 34 mi Djokovic hian a vawi 10 nan Australian Open champion nih a tum dawn. Melbourne Park-ah a hlawhtling thei a nih chuan Roger Federer leh Nadal te nena record inṭawm an neih khumin major title la hnem ber a ni ang.

Ngaihven hlawh
Season hmasa khan Daniil Medvedev-a'n final a lut a, mahse Djokovic a ngam lo. Russian star hian US Open-ah erawh Novak hnehin nomawi a chawi thung, kuminah pawh player ngaihven hlawh a ni leh dawn - a match hmasa berah Henri Laaksonen nen an inkhel ang.

Alexander Zverev-a'n bul ṭan nan Daniel Altmaier a hmachhawn dawn a, fourth round-a a hmachhawn theih turah Denis Shapovalov leh service nei ṭha tak Reilly Opelka te an awm avangin quarterfinal thlen phak pawh a harsa dawn.

Grand Slam champion tura theihna nei, mahse la champion lo Stefanos Tsitsipas kalkawngah Andy Murray a awm leh dawn. Player pahnih hi nikum US Open-ah khan an intawng a, sawi hlawh takin Murray a chak lo, an intawng leh a nih chuan a hmuhnawm ang.

Hmeichhe lam
Ashleigh Barty-i'n Grand Slam nomawi pahnih a chawi tawh a, an ramah hian a la champion lo thung. 2020 khan semifinal a thleng a, final pawh a la lut miah lo. Kuminah champion a tum dawn, a match hmasa berah qualifier aṭanga in vaw tling a tum dawn.

Champion lai Naomi Osaka bul ṭanna tur chu Camila Osorio a ni dawn. Barty leh Osaka te hi an kaltluang a nih chuan fourth round-ah an intawng dawn, an inkhel a nih chuan hmeichhe singles match hmuhnawm ber tur zinga mi a ni ang.

British tleirawl Emma Raducanu-i'n US Open title a lak theih avangin a lakah mipui mit a fu dawn. Seeded 17-na hian world number 68 Sloane Stephens a tum dawn; American player hi 2017 US Open champion a nih avangin first round inkhel ngaihven hlawh an ni dawn.

Entu 50%
Hripui vangin Australian Open hi stadium khatin entu an awm thei dawn lo. Melboure Park awmna state Victoria sorkar chuan nimin khan thuchhuah an siam a, stadium chhungah entu awm thei dawn mah se 50% chauh an awm thei ang.

Rod Laver Arena leh Margaret Court Arena-a en tumin fans tam takin ticket an la tawh a, ticket la lawksa hi 50% aiin an tam zawk. Court pahniha entu tur hi ticket pek chhuah tawhsa anga kaltlangpui a ni dawn thung a ni.

Nilaini khan Victoria-ah hian hri kai thar mi 37,000 lai an hmuh belh a, mi 25 an thi bawk. Mi 953 lai chu damdawi ina enkawl ngai an nih avangin fimkhur a ngai a, stadium khata pun khawm an remti rih lo hi a mak hran lo.