Villa-ah Digne a lut fel

France international Lucas Digne chuan Everton aṭangin Aston Villa a zawm a, a man hi pound maktaduai 25 thlenga la sang chho thei tur a ni ang.

Rafael Benitez enkawlna hnuaiah Digne-a'n tun hnaiah hmun nghet a chang lo, thlasik bazarah chhuah a dil angin phalsak a ni. Chelsea, Newcastle leh West Ham te pawhin ngaihven mah se Villa pan a thlang ta zawk.

Villa manager Steven Gerrard chuan, "Lucas a lak theih a ni tih kan hriat khan thapui kan thawh. Ani ang player ṭha leh tawnhriat nei ṭha January thlaa lakluh theih hi a hlu hle," tiin a sawi.

Kum 28 mi Digne hian 2018 khan Barcelona aṭangin Everton hi a zawm. English club tan hian match 127 khelin goal ruk a khungsak, tun season kal laiah bik inelna hrang hrangah match 15 a khel - mahse December thla chinah a la inkhel leh lo.

Thlasik bazarah Villa hian Digne hma hian Philippe Coutinho an lalut tawh bawk. Brazilian playmaker leh France international an neih belh avangin Premier League season chawhnu lam hman pawh a phurawm zual ngei ang.