Spanish Super Cup ; Real hmaah Barca an tlawm
Saudi Arabia-in El Clasico a thleng a, Spanish Super Cup semifinal-ah Real Madrid chuan 3-2 in Barcelona an hneh a, final an lut.
Real-in vawi thum ngawt goal an khung hmasa a, Barca-in vawi hnih an sut. Real tan Vinicius Junior leh Karim Benzema ten vawi hnih ngawt an team hma an hruaipui.
Barca-in Luuk de Jong leh Ansu Fati goal hmangin an chhanglet a, minute 90 chhungin team pahnihin goal dang an khung lo - extra time khelh a ni.
Real tan Federico Valverde chuan minute 98-naah a khung leh a, hei erawh Barca-in a chhanletna tur an nei thei lo - goal dang lut loin inkhel a tawp a, coach a nih hnua a vawi khat nana El Clasico hmachhawntu Xavi a chak zo lo.
Intum tawk
La Liga hmahruaitu chu Real Madrid an ni a, an elpui ber ni ṭhin Barcelona erawh an tlakchhiat lai a ni a, Madrid khaw club nen an inkarah point 17 ngawt a awm - an inthlau vet vet hle.
League lama El Clasico-ah pawh Real-in Barcelona an lo hneh tawh a, Xavi hoa insiamṭhat hna thawk mek Barca tan an hmingchhiatna thaireh turin Real hneh a ṭul takzet.
Mahse, King Fahd International Stadium, Riyadh-a inkhelah Real-in goal an khung hmasa zawk a, minute 25-naah Vinicius chuan Benzema siamsak chu goal hmahruaitu ni turin a khung.
Barca an hnual rei lo. Catalan club hian kut ruaka Saudi hawsan duh loin inkhel hmuhnawm an pho chhuak a, Luuk de Jong chuan minute 41-naah Barca squad tikimtu satliah a ni lo tih lantirin si phurh a sut.
A tawpah Real
Real Madrid-in Spanish Super Cup nomawi chawi ngei an duh a, an duhna chu goal hmangin an lantir - minute 72-naah Benzema chuan a vawi hnih nan Real chu hma a hruaipui a, 2-1 a ni.
Mahse, Barca an beidawng duh lo. Minute 83-naah bench aṭanga luhtir Fati chuan Barca tan rawlthar beiseiawm a la ni reng tih pholangin si phurh a sut a, Jordi Alba siamsak a tauh lut.
Minute 90 chhungin goal dang a lut tawh lo. Final lut tur zawk chinfel nghal a ṭul avangin extra time khelh a ni a, minute 98-naah Valverde chuan Real tan chakna goal a rawn khung.
Goal an chhuah hmasak pahnih suttu Barca-in si phurh sutna tur an nei tawh lo a, hun a tawp meuh chuan 3-2 in Real an chak a, Riyadh khawpuiin El Clasico hmuhnawm tak an thleng hi an lawm khawp ang.
Chul thei lo Benzema
Real leh Barca team-a player beiseiawm leh ṭha tak tak kara inkhel danglamna thlentu chu Karim Benzema a ni a, French striker hian goal khat a khung bakah assist vawi khat a nei.
Kum 34 mi striker hian goal hnih a thawhchhuah bakah inkhelh chhung zawngin a hnawk tluan chhuak zak - vawi khat post a tih per a, extra time-ah uiawm takin a khung lo bawk.
Benzema hian tun season inelna hrang hrangah match 26 khelin goal 23 a khung tling tawh a, assist vawi kua a nei bawk - a kum nena ngaihtuah tel phei chuan a season hman dan hi ropui tak a ni.
Kum 21 mi Vinicius a lam tel loh theih loh a, counter attack-ah Barca tlarhnung tan a hlauhawm ṭhin hle - tun season-ah match 27 khela goal 15 khungin assist vawi kua a nei tawh a, a mimal angin tun anga season hman ṭhat a la nei ngai lo.
Khawiah nge Torres?
Barcelona-in thlasik transfer-ah Manchester City aṭangin Ferran Torres an lalut a, Barca president Joan Laporta chuan, "Barca kan lo kir leh ta," tih hiala sawiin, Torres lakluh chu an bul ṭan ṭhatna a nih thu a sawi.
Saudi Arabia-ah pawh inkhel turin Torres hruai a ni a, mahse, Spain international hian a beisei angin danglamna erawh a thlen nghal thei lo a, Real lakah a khel tluan lo.
Barca-in Real ngam lo mah se lawmna tur erawh a awm. Xavi hnuaia an khelh danah hmasawnna tur a awm a, Catalan club legend hian thuneitu lama thlawpna a hmu ṭha bawk a nih chuan danglamna a la thlen ngeiin a rinawm.
Nilaini zan inkhelah pawh hian Ousmane Dembele, Pedri leh Fati ten an goal khung piahlamah chance duhawm an nei vek a, an vanneih zan ni se, chak thei an ni.
Spanish Super Cup Semifinal
January 12, Nilaini Zan
Barcelona 2-3 Real Madrid
BAR: Luuk de Jong 41'; Ansu Fati 83'
REM: Vinicius Junior 25'; Karim Benzema 72'; Federico Valverde 98'
January 16, Pathianni Zan - Final
Real Madrid vs Atletico Madrid/
Athletic Bilbao